ޔޫއެފާ ޗެމްޕިއަންސް ލީގުގައި ކައިރަތު އަލްމަޓީއާ ދެކޮޅަށް ކުޅުނު މެޗު 3-2 އިން ކާމިޔާބުކޮށް، އާސެނަލް އިން އެ ކްލަބުގެ ރެކޯޑެއް ކަމަށްވާ ވިދިވިދިގެން އަށްވަނަ ޔޫރަޕިއަން މޮޅު ހޯދައި، ލީގު ފޭސްގެ ހުރިހާ މެޗަކުން މޮޅުވެ 100 އިންސައްތަ ރެކޯޑަކާއެކު ނިންމާލައިފިއެވެ.
ލީގު ތާވަލުގެ އެއްވަނައިގައި އޮތް މިކޭލް އާޓެޓާގެ ޓީމަށް މި މެޗުން މޮޅުވުމުގެ މާބޮޑު ޕްރެޝަރެއް ނެތް ނަމަވެސް، މުބާރާތުން ކަޓާފައިވާ ކަޒަކިސްތާނުގެ ޗެމްޕިއަނުންނާ ދެކޮޅަށް މެޗުގެ ދެވަނަ މިނެޓުގައި އެޓީމުން ވަނީ ލީޑު ނަގާފައެވެ. މި ލަނޑު ކާމިޔާބުކޮށްދިނީ ކައި ހާވަޓްޒް ތަނަވަސްކޮށްދިން ފުރުސަތަކުން ވިކްޓަރ ގިޔޮކެރޭސްއެވެ.
ނަމަވެސް، އޭރިއާ ތެރެއިން ރިކާޑޯ ކަލަފިއޯރީ، ޖޯޖީނިއޯއަށް ފައުލްކުރުމާ ގުޅިގެން ލިބުނު ޕެނަލްޓީ ކާމިޔާބުކޮށް ކައިރަތުން ވަނީ ހައިރާންކުރުވަނިވި ގޮތަކަށް ނަތީޖާ ހަމަހަމަކޮށްފައެވެ.
މިއީ މި ފަހަރުގެ ލީގު ފޭސްގައި އާޓެޓާގެ ޓީމު ކޮޅަށް ވަން އެންމެ ތިންވަނަ ލަނޑެވެ. އެކަމަކު ގާތްގަނޑަކަށް އަހަރެއްހާ ދުވަހަށްފަހު ހާވަޓްޒް ކާމިޔާބުކުރި ފުރަތަމަ ލަނޑާއެކު އާސެނަލް އިން އަލުން ލީޑު ނެގިއެވެ. ބެން ވައިޓް ދިން ބޯޅައެއް ހިފައިގެން އޭރިއާ ތެރެއަށް ވަދެ ހާވަޓްޒް ވަނީ ވަރަށް ފުރިހަމަ ފިނިޝިންއަކުން ގޯލުގެ ތެރެއަށް ބޯޅަ ފޮނުވާލާފައެވެ.
މިއީ އާޓެޓާގެ ޓީމުން ހޯދާނެ ކަމަށް ބެލެވުނު މޮޅެއް ނަމަވެސް، މިއީ މިދިޔަ ހަފުތާ ބަންދުގައި ޕްރިމިއާ ލީގުގައި މެންޗެސްޓާ ޔުނައިޓެޑް އަތުން ލިބުނު ހިތްދަތި ބައްޔަށްފަހު، އުތުރު ލަންޑަނުގެ މި ޓީމު އަލުން ފޯމަކަށް އެޅުމަށް ލިބުނު މުހިންމު މޮޅެކެވެ.
އާސެނަލް އިން މިހާރު ވަނީ ޔޫރަޕްގެ މުބާރާތްތަކުގައި އަމިއްލަ ދަނޑުގައި ކުޅުނު ގްރޫޕް ސްޓޭޖް ނުވަތަ ލީގު ފޭސްގެ ފަހު 17 މެޗުން މޮޅުވެފައެވެ. އަދި އަންނަ މެއި މަހު ތަށި އުފުލާލާނެ ކަމަށް އެންމެ ބޮޑަށް ބެލެވޭ ޓީމުތަކުގެ ތެރޭގައި އެޓީމު އަދިވެސް ހިމެނެއެވެ.
މިދަނޑިވަޅުގައި، ކައިރަތުގެ ތާރީޚީ ދަތުރު ނިމުމަކަށް އައިސްފައިވާއިރު، އެޓީމު މުބާރާތުން ވަކިވީ އެންމެ ޕޮއިންޓަކާއެކުގައެވެ.
