ސައުދީ ޕްރޯ ލީގުގައި ފައިސާގެ މައްސަލަތަކަކާއި ޓްރާންސްފާގެ ކަންކަމުގައި އުފެދުނު ހިޔާލުތަފާތުވުންތަކަކާ ގުޅިގެން ދެ މެޗު ދޫކޮށްލުމަށްފަހު، ކްރިސްޓިއާނޯ ރޮނާލްޑޯ އަލް-ނަސްރުގެ ފުރަތަމަ އެގާރައަށް އެނބުރި އައިސް އަލް-ފަތެހް ކޮޅަށް ލަނޑު ޖަހައިފިއެވެ.
ކްލަބުގެ ކެޕްޓަން ރޮނާލްޑޯ ހަޅުތާލުކުރީ ވާދަވެރި އަލް-ހިލާލުން އޭނާއާއެކު ކުރިން ރެއާލް މެޑްރިޑަށް ކުޅުނު ކަރީމް ބެންޒެމާ ސޮއިކުރުވުމުން، އޭނާގެ ކްލަބަށް ޓްރާންސްފާ މާކެޓުގައި ހަރަކާތްތެރިވުމަށް ހުރަސްތަކެއް ކުރިމަތިވުމާ ގުޅިގެންނެވެ.
މިދިޔަ ދެ ލީގު މެޗުގައި ބައިވެރިނުވެ ހުރުމަށްފަހު، ހޮނިހިރު ދުވަހު އަލް-ފަތެހްއާ ދެކޮޅަށް ކުޅުނު ސައުދީ ޕްރޯ ލީގު މެޗުގައި ރޮނާލްޑޯ ވަނީ އަލް-ނަސްރުގެ ފުރަތަމަ އެގާރައިގައި ހިމެނި، ޓީމުގެ ކެޕްޓަންކަން ކޮށްފައެވެ.
މި މަހުގެ ކުރީކޮޅު އަލް-އިއްތިހާދު އަދި އަލް-ރިޔާޒާ ދެކޮޅަށް ކުޅުނު މެޗުތަކުގައި އުމުރުން 39 އަހަރުގެ ރޮނާލްޑޯ ފެނިފައިނުވާއިރު، ރިޕޯޓްތައް ބުނާގޮތުން އޭނާ މެޗުތަކުގައި ބައިވެރިނުވީ ކްލަބުގެ ޓްރާންސްފާގެ ކަންކަމާ މެދު ހިތްހަމަނުޖެހިގެން ގަސްދުގައެވެ. ރޮނާލްޑޯ ހިތްހަމަނުޖެހުނީ ވާދަވެރި އަލް-ހިލާލުން އޭނާގެ ކުރީގެ އެކުވެރިޔާ ހިމެނޭހެން ބޮޑެތި އިންވެސްޓްމަންޓްތައް ކުރަމުންދިޔައިރު، ސައުދީ އަރަބިއްޔާގެ ޕަބްލިކް އިންވެސްޓްމަންޓް ފަންޑުން (ޕީ.އައި.އެފް) މިދިޔަ ޓްރާންސްފާ ވިންޑޯގައި އަލް-ނަސްރު ވަރުގަދަކުރުމަށް އެކަށީގެންވާ މަސައްކަތެއް ކޮށްފައިނުވާތީއެވެ.
މި ހަފްތާގައި ކުރެވުނު މަޝްވަރާތަކަށްފަހު، ރިޕޯޓްތައް ބުނާގޮތުގައި މައިގަނޑު މައްސަލަތަކަށް ވަނީ ހައްލު ހޯދައިދީފައެވެ. މީގެ ތެރޭގައި ނުދެވި ހުރި މުސާރައިގެ ފައިސާ ދިނުމާއި، އަލް-ނަސްރުގެ އެގްޒެކެޓިވްުންނަށް ކްލަބު ހިންގުމުގެ ފުރިހަމަ ބާރު އަލުން ދިނުން ހިމެނެއެވެ. މި ކުރިއެރުންތަކާ ގުޅިގެން، ފޯވާޑް ވަނީ އަލުން ކުޅުމަށް އެއްބަސްވެފައެވެ.
ސައުދީ ޕްރޯ ލީގުން ވެސް މިކަމާ ގުޅޭގޮތުން ބަޔާނެއް ނެރެފައިވެއެވެ. އެ ބަޔާނުގައި ބުނެފައިވަނީ: "ކްރިސްޓިއާނޯ އައީއްސުރެ އަލް-ނަސްރާއެކު ފުރިހަމައަށް މަސައްކަތް ކުރަމުންދާ ކަމަށާއި، ކްލަބުގެ ކުރިއެރުމާއި އުންމީދުތަކުގައި އޭނާ މުހިންމު ދައުރެއް އަދާކުރާ ކަމަށެވެ. ކޮންމެ މޮޅު ކުޅުންތެރިއަކު ފަދައިން އޭނާ ވެސް ބޭނުންވަނީ މޮޅުވާށެވެ. ނަމަވެސް އެއްވެސް މީހަކަށް – އެއީ ކިތަންމެ މުހިންމު މީހެއް ކަމުގައި ވިޔަސް – އަމިއްލަ ކްލަބުން ބޭރުގެ ނިންމުންތަކެއް ނުނިންމޭނެއެވެ."
ދަނޑަށް އެނބުރި އައުމަށްފަހު، ރޮނާލްޑޯ ވަނީ އޭނާގެ މުހިންމުކަން ސަޕޯޓަރުންނަށް ހަނދާންކޮށްދިނުމަށް މާ ގިނަ ވަގުތެއް ނުނަގައެވެ.
މެޗުގެ ކުރީކޮޅު އަލް-ނަސްރުގެ ފަރާތުން ފެނުނު ވަރުގަދަ ހަމަލާތަކަށްފަހު، ފުރަތަމަ ލަނޑު ފެނިގެންދިޔައީ 18 ވަނަ މިނެޓުގައެވެ. ސާޑިއޯ މާނޭ އޭރިއާ ތެރެއަށް ދިން ބޯޅައެއް، ރޮނާލްޑޯ ވަނީ އެއްފަހަރުން ޖަހައި ގޯލުގެ ތިރީ ކަނަށް ފޮނުވާލާފައެވެ.
ލަނޑު ޖެހުމުގެ ކުރިން ވެސް ރޮނާލްޑޯ ދިޔައީ މެޗުގައި ވަރަށް ބޮޑަށް ބައިވެރިވަމުންނެވެ. ފުރަތަމަ މިނެޓުގައި އޭނާ ފޮނުވާލި ހަމަލާއެއް ގޯލުގެ ހުރަސް ދަނޑިމަތިން ދިޔައިރު، ފަހުން މާސެލޯ ބްރޮޒޮވިޗް ދިން ބޯޅައަކުން އޭރިއާ ބޭރުން ވެސް ހަމަލާއެއް އުފެއްދިއެވެ. މީގެ އިތުރުން ޖޮއާއޯ ފެލިކްސް އާއި ކިންގްސްލީ ކޯމަންއަށް ވެސް މެޗުގެ ކުރީކޮޅު ފުރުސަތުތަކެއް ލިބުނެވެ.
މި މެޗަށް ނުކުތްއިރު އަލް-ނަސްރު އޮތީ ތާވަލުގެ ތިންވަނައިގައެވެ. އެއްވަނައިގައި އޮތް އަލް-ހިލާލަށްވުރެ ހަތަރު ޕޮއިންޓް ފަހަތުގައި އޮތް ނަމަވެސް، އަލް-ނަސްރު އަތުގައި އިތުރު މެޗެއް އޮތުމުން، އެ ޓީމު އަދިވެސް އޮތީ ތަށީގެ ރޭހުގައި ވަރުގަދަކޮށެވެ.
އަމިއްލަ ކާމިޔާބީއަށް ބަލާއިރު، ރޮނާލްޑޯ ދަނީ ރަން ބޫޓަށް ވެސް ވާދަކުރަމުންނެވެ. އޭނާ މިވަގުތު އޮތީ ލަނޑު ލިސްޓުގެ ކުރީގައި އުޅޭ އަލް-އަހްލީގެ ފޯވާޑް އިވާން ޓޯނީ އާއި އަލް-ގާދިސިއްޔާގެ ޖޫލިއަން ކީނޯނޭސްގެ ފަހަތުގައެވެ. ހޮނިހިރު ދުވަހު ޖެހި ލަނޑަކީ މި ސީޒަނުގައި އޭނާ ޖެހި 17 ވަނަ ލަނޑެވެ.
