ދުވާލަކު ފަސް ތަށި ނުވަތަ އެއަށްވުރެ ގިނައިން ކޮފީ ބުއިމަކީ ފުރަމޭ ހަލާކުވުން އަދި ފުރަމޭގެ ކެންސަރު ފަދަ ނުރައްކާތެރި ބަލިތައް ޖެހުމުގެ ފުރުސަތު ވަރަށް ބޮޑަށް ކުޑަކޮށްދޭ ކަމެއްކަން އައު ދިގު މުއްދަތުގެ ދިރާސާއަކުން ދައްކައިފިއެވެ. މިއީ ކަޅު ކޮފީއަކީ ފުރަމޭގެ ދުޅަހެޔޮކަން ރައްކާތެރިކުރުމުގައި މުހިންމު ދައުރެއް އަދާކުރެވިދާނެ އެއްޗެއްކަން ހާމަވި އާ ހެއްކެކެވެ.
ސީޑާސް-ސައިނާއީ މެޑިކަލް ސެންޓަރުގެ ދިރާސާވެރިން ވަނީ ޔޫ.ކޭ ބަޔޯބޭންކުގައި ރަޖިސްޓްރީވެފައިވާ 355,000 އަށްވުރެ ގިނަ މީހުންގެ ސިއްހީ މައުލޫމާތު ދިރާސާކޮށްފައެވެ. މި ދިރާސާ ފެށިއިރު މީގެ ތެރެއިން އެއްވެސް މީހަކީ ފުރަމޭގެ ބައްޔެއް ހުރި މީހެއް ނޫނެވެ. އަދި އެވްރެޖްކޮށް 13 އަހަރު ވަންދެން އެމީހުންގެ ސިއްހީ ހާލަތު ވަނީ ބަލާފައެވެ.
'ކްލިނިކަލް ގެސްޓްރޯއެންޓްރޮލޮޖީ އެންޑް ހެޕަޓޮލޮޖީ' ޖާނަލްގައި ޝާއިއުކޮށްފައިވާ މި ދިރާސާގެ ނަތީޖާތަކުން ދައްކާގޮތުގައި، ދުވާލަކު މަދުވެގެން ފަސް ތަށި ކޮފީ ބޯ މީހުންނަށް، ކޮފީ ނުބޯ މީހުންނާ އަޅާބަލާއިރު، ފުރަމޭ ހަލާކުވުމުގެ ފުރުސަތު 32 އިންސައްތަ ކުޑައެވެ. އަދި ފުރަމޭގެ ކެންސަރު ޖެހުމުގެ ފުރުސަތު ގާތްގަނޑަކަށް 50 އިންސައްތަ ކުޑައިރު، ފުރަމޭގެ ބަލިތަކުގައި މަރުވުމުގެ ފުރުސަތު 42 އިންސައްތަ ކުޑަކަމަށް ދައްކައެވެ.
މި ދިރާސާގެ އިސް މުސައްނިފު، ސީޑާސް-ސައިނާއީގެ ޓްރާންސްޕްލާންޓް ހެޕަޓޮލޮޖިސްޓް ޑރ. ހިޔުންސިއޮކް ކިމް ވިދާޅުވި ގޮތުގައި، މި ނަތީޖާތަކުން ކޮފީއާއި ފުރަމޭގެ ދުޅަހެޔޮކަމާ ހުރި ގުޅުން އިތުރަށް ވަރުގަދަވެގެންދެއެވެ. އަދި ކޮފީ ބޯ މިންވަރު އިތުރުވި ވަރަކަށް އޭގެ ރައްކާތެރިކަން އިތުރުވާކަން ފާހަގަކުރެވުނު ކަމަށްވެސް އޭނާ ވިދާޅުވިއެވެ.
މި ދިރާސާގައި އެމް.އާރު.އައި ސްކޭންތަކާއި ލޭގެ ޕްރޮޓީން ޕްރޮފައިލްތައްވެސް ވަނީ ބަލާފައެވެ. ކޮފީ ބޯ މީހުންގެ ފުރަމޭގައި ސަރުބީ ހުންނަ މިންވަރު މަދުވުމާއި، ދުޅަވުން ކުޑަވުމާއި، އަދި ފުރަމޭގެ ދުޅަހެޔޮކަން ދައްކައިދޭ ބަޔޮލޮޖިކަލް ބަދަލުތަކެއް ފެނިފައިވެއެވެ.
ސައިންސްވެރިން ގަބޫލުކުރާ ގޮތުގައި ކޮފީން މި ފައިދާ ލިބެނީ އޭގައި ހިމެނޭ ސަތޭކައަށްވުރެ ގިނަ ބަޔޯއެކްޓިވް މާއްދާތަކުގެ ސަބަބުންނެވެ. މީގެ ތެރޭގައި ކްލޮރޯޖެނިކް އެސިޑްސް، ޕޮލިފީނޯލްސް އަދި ކެފެއިން ހިމެނެއެވެ. މި މާއްދާތަކަކީ ފުރަމޭގައި ލަކުނުލުމާއި ދުޅަވުން ކުޑަކޮށްދީ، މެޓަބޮލިކް މަސައްކަތްތައް ރަނގަޅުކޮށްދޭ މާއްދާތަކެކެވެ.
ފާހަގަކޮށްލެވޭ ކަމަކީ، ކެފެއިން ހުންނަ ކޮފީއާއި ކެފެއިން ނުހުންނަ ކޮފީ ބޭނުންކުރާ މީހުންގެ ފަރާތުންވެސް މިފަދަ އެދެވޭ ނަތީޖާތަކެއް ފެނިފައިވުމެވެ. މިއިން ދޭހަވަނީ ފުރަމޭ ރައްކާތެރިކޮށްދެނީ ހަމައެކަނި ކެފެއިން ނޫންކަމެވެ.
މި ދިރާސާގައި ބައިވެރިނުވާ ނިއުޓްރިޝަން އެކްސްޕާޓް މެރިޑަން ޒާނާ ވިދާޅުވި ގޮތުގައި، ކޮފީއަކީ ހަމައެކަނި ހައްލެއްގެ ގޮތުގައި ބެލުމުގެ ބަދަލުގައި، އެއީ ދުޅަހެޔޮ ދިރިއުޅުމެއްގެ އެއް ބައިގެ ގޮތުގައި ބަލަންޖެހެއެވެ. ފުރަމޭގެ ދުޅަހެޔޮކަން ދެމެހެއްޓުމަށްޓަކައި ހަށިގަނޑުގެ ބަރުދަން އެއްވަރެއްގައި ހިފެހެއްޓުމާއި، ކަސްރަތުކުރުމާއި، ބަލިތަކުން ރައްކާތެރިވުމާއި، އަދި ސިއްހަތަށް ފައިދާހުރި ކާނާ ބޭނުންކުރުން މުހިންމުކަން އޭނާ ފާހަގަކުރެއްވިއެވެ.
މި ދިރާސާއިން ކޮފީއާއި ފުރަމޭގެ ދުޅަހެޔޮކަމާ ހުރި ގުޅުން ސާފުކޮށް ފެނުނު ނަމަވެސް، ދިރާސާވެރިން ބުނަނީ މިއީ އަދި އިތުރަށް ކްލިނިކަލް ދިރާސާތައް ކުރަންޖެހޭ ކަމެއް ކަމަށެވެ. ކުރިއަށް އޮތް ދިރާސާތަކުން ފުރަމޭގެ ސިއްހަތަށް އެންމެ ފައިދާހުރި ކޮފީގެ ބާވަތާއި މިންވަރު ދެނެގަނެވޭނެކަމަށް އެ ބޭފުޅުން އުއްމީދުކުރަށްވައެވެ.
