ޒިންމާއަކީ ކޮންމެ ފަރުދަކުވެސް ދެނެގަނެ، އަދާކުރަންޖެހޭ ދިރިއުޅުމުގެ މުހިންމު ބައެކެވެ. ދިރިއުޅުމުގައި ބޭނުންތެރި ރުކުނެކެވެ. އެއީ އެމީހެއްގެ އަމަލުތަކާއި، ނިންމުންތަކާއި، ވާޖިބުތައް އަދާކުރުމުގެ ޤާބިލުކަން ހުރި މިންވަރު ދައްކައިދޭ ކަމެކެވެ. ޒިންމާދާރުވުމުގެ މާނައަކީ މަސްއޫލިއްޔަތު އުފުލުމެވެ. އެއީ ކަމެއް އަދާކުރުމުގައި ފުރިހަމަ ސުލޫކެއް ދެއްކުމާއި، އަދި އެ އަދާކުރާ ކަމަކުން ނުކުތް ނަތީޖާއާ މެދު ޖަވާބުދާރީވުމުގައި އަމިއްލަ ޒިންމާ ނެގުމެވެ. މިއަދުގެ ބަވަނަ ވެފައިވާ ދުނިޔޭގައި، އަދި ކަންކަން ބާރު ދުވެއްޔެއްގައި ބަދަލުވަމުންދާ މާހައުލުގައި، ޚާއްޞަކޮށް ބޮޑެތި މީހުންގެ އުމުރަށް ވަދެ، މުޖުތަމަޢުގައި އިތުރު މުހިންމު ދައުރުތަކެއް އަދާކުރަން ތައްޔާރުވަމުންދާ ދަރިވަރުންނަށް ޒިންމާގެ މުހިންމުކަން މާބޮޑަށްވެސް ފާހަގަ ނުކުރެވޭނެއެވެ. ޒިންމާ އަދާކުރުމަށް ތައްޔާރުވުމުގެ ބޭނުންތެރިކަން ތަސައްވުރު ކުރެވޭނެއެވެ
ޒިންމާދާރުވާނީ ކިހިނެތްތޯއެވެ؟ އެއީ އަމިއްލަ ވިސްނުމާއި ޝައުޤުވެރިކަން ހުރެގެން އަދާކުރެވޭނެ ކަމެކެވެ. ދަސްވާ ދަސްވުމެއްގެ މައްޗަށް ބިނާކޮށް ޢަމަލުން ދައްކަންޖެހޭނެ ކަމެކެވެ. އެކަމަކީ މަޖުބޫރު ކޮށްގެން ޙާސިލުވާނެ ކަމެއް ނޫނެވެ. ކުލާހުގައި މުދައްރިސް ކިޔަވައިދެއްވާއިރު، ކަނުލައި އަޑުއެހުމަކީ ޒިިންމާދާރުވުމެވެ. ކުލާސް ސާފުތާހިރުކޮށް ބޭއްވުމަށް ކުލާސްތެރެއަށް އެޅިފައިވާ ކަރުދާސްތައް ހޮވައި ނެގުމުގައި ބައިވެރިވުމަކީ ޒިންމާދާރުވުމެވެ. ޕްރިންސިޕަލް ދަރިވަރުންނަށް ނަސޭހަތްތެރިވުމުން އަދަބު އިޙްތިރާމް އަދާކުރުމަކީ ޒިންމާދާރުވުމެވެ. ސްޕޯޓްސް ކެޕްޓަން މުބާރާތް އިންތިޒާމުކުރާއިރު، ދަނޑު ތައްޔާރުކުރުމުގެ މަސައްކަތުގައި ޝާމިލުވެ ޙަރަކާތްތެރިވުމަކީ ޒިންމާދާރުވުމެވެ. މަންމަ ގޭތެރެ ސާފުކުރާއިރު، އެކަމުގައި މަންމައަށް އެހީތެރިވުމަކީ ޒިންމާދާރުވުމެވެ. ބައްޕަ ވަޑާންކުރާއިރު، މޮހޮރު ޖަހާ ފިލާގަނޑު ހިފަހައްޓައި ދިނުމަކީ ޒިންމާދާރުވުމެވެ. ކާފަ ފުރަން ނިކުންނައިރު، ކާފަގެ ފޮށިތަންމަތި އުފުލައިދިނުމަކީ ޒިންމާދާރުވުމެވެ. ނަމާދު އޭގެ ވަގުތުގައި އަދާކުރުމަކީ ޒިންމާދާރުވުމެވެ. ޤުރުއާން ކިޔެވުމާއި ރިވެތި މިސާލު ދެއްކުމަކީ ޒިންމާދާރުވުމެވެ. ކަންކަމުގައި މަކަރު ނުހެދުމަކީ ޒިންމާދާރުވުމެވެ. ދޮގުހެދުމުން ދުރުހެލިވުމަކީ ޒިންމާދާރުވުމެވެ. މިހެންގޮސް އެތައް ކަމެކެވެ.
ޒިންމާދާރުކަން ދަރިވަރުންގެ ކިބައިގައި އަށަގަންނުވަންޖެހޭ މައިގަނޑު އެއް ސަބަބަކީ، އެއީ ދަރިވަރުންނަށް ދިރިއުޅުމުގެ މުހިންމު ހުނަރުތައް ތަރައްގީ ކުރުމަށް އެހީތެރިވެދޭ ކަމެއް ކަމުގައިވުމެވެ. އެ ދަރިވަރުންގެ މަސައްކަތުގައި ޒިންމާ ނަގައިގެން އުޅުމަކީ، އެ ދަރިވަރުން ވިސްނުންތެރިކަމާއެކު ނިންމުންތައް ނިންމުމާއި، ކުރިމަތިވާ މައްސަލަތައް އެންމެ އެކަށޭނެ ގޮތުގައި ޙައްލުކުރަން އެނގުމެވެ. މި ހުނަރުތަކަކީ އުނގެނުމުގެ މަރުޙަލުގައްޔާއި، އާންމު ދިިރިއުޅުމުގައި ވެސް، ކާމިޔާބީއަށް ވާސިލުވުމަށް، ވަރަށް މުހިންމު ހުނަރުތަކެކެވެ. ޒިންމާދާރު ދަރިވަރުންނަށް، ކިޔެވުމުގައި މޮޅުވެ، އެކު އުޅޭ ކުދިންނާއި ޓީޗަރުންނާ ވަރުގަދަ ގުޅުންތައް އުފެދި، ލަނޑުދަނޑިތައް ހާސިލްކުރުމުގެ ފުރުސަތު ބޮޑުވެއެވެ.
މީގެ އިތުރުން ޒިންމާދާރުކަމަކީ ދަރިވަރުންނަށް ނަޒާހަތްތެރިކަމާއި ތެދުވެރިކަމުގެ އަގު ދަސްކޮށްދޭ ކަމެކެވެ. ދަރިވަރުން އެކުދިންގެ ކަންކަމަށް ޖަވާބުދާރީވެ، ނަޒާހަތްތެރިކަމާއެކު އަމަލުކުރަން އެނގި، އަޚްލާޤީ މިންގަނޑުތައް ދަމަހައްޓަން ދަސްވެއެވެ. މިއީ ހަމައެކަނި އެހެން މީހުންގެ އިތުބާރާއި އިޙްތިރާމް ހޯދުމަށް އެހީތެރިވެދޭ ކަމެއް ނޫނެވެ. ހަމައެހެންމެ، މިކަމަކީ މުޅި އުމުރުގައިވެސް ނިންމުންތައް ނިންމުމުގައި މަގުދައްކައި، ތިމާގެ ކިބައިގައި ވަރުގަދަ އަޚްލާޤެއް ބިނާކުރުމުގެ ފުރުޞަތު ލިބިގެންދާ ކަމެކެވެ. ޒިންމާދާރު ދަރިވަރުންނަށް ނަޒާހަތްތެރިކަމާއެކު އަމަލުކުރުމާއި، އެކަމުގެ އަގުތައް ދެމެހެއްޓުމުގެ މުހިންމުކަން ވިސްނޭތީ، ނަޒާހަތްތެރިކަން ކުޑަ ނުވަތަ އަޚްލާޤީ ގޮތުން ގޯސް ކަންތައްތަކުގައި ބައިވެރިވުމުގެ ފުރުޞަތު ކުޑައެވެ.
ދަރިވަރުންގެ އަޚްލާޤާއި ޝަޚުޞިއްޔަތު ބައްޓަންކުރުމުގައި ވެސް ޒިންމާދާރުކަން ވަރަށް މުހިންމު ދައުރެއް އަދާކުރެއެވެ. ކަންކަމުގައި ޒިންމާއުފުލައި ނިންމުންތައް ނިންމާއިރު، އަމިއްލަ ނަފްސުގެ ސުލޫކާއި، ކެތްތެރިކަމުގެ މުހިއްމުކަން އެފަދަ ދަރިވަރުންނަށް އިހުސާސް ކުރެވޭނެއެވެ. މި ސިފަތަކަކީ ގޮންޖެހުންތަކުން އަރައިގަތުމާއި، މުސީބާތްތަކާ ކުރިމަތިލުމާއި، ދިރިއުޅުމުގައި ކާމިޔާބީ ހޯދުމަށް ކޮންމެހެން ބޭނުންތެރި ސިފަތަކެކެވެ. ޒިންމާދާރު ދަރިވަރުންނަކީ އަމިއްލައަށް ކަންކަމުގައި ޝާމިލުވެ، ހާސިލުކުރަން ބޭނުންވާ ލަނޑުދަނޑިތަކަށް ލޯބިކުރާނެ ބައެކެވެ. އަދި މި ސިފަތަކަކީ، މިއަދުގެ ވާދަވެރި ދުނިޔޭގައި، އެމީހުންގެ ޤާބިލުކަން އިތުރުކޮށް، އިތުބާރު ކުރެވޭ ބައެއް ކަމުގައި ވުމަށްޓަކައި ވަރަށް މުހިއްމު ސިފަތަކެކެވެ.
މީގެ އިތުރުން ޒިންމާދާރުވުމަކީ، ދަރިވަރުން އެކުދިންގެ މުޖުތަމަޢުގައި ހީވާގި ކަމާއެކު ޙަރަކާތެރިވެ، މުޖުތަމަޢުގައި ޝާމިލުވާ މެމްބަރުންނަށް ވުމަށް އެހީތެރިވެދޭ ކަމެކެވެ. ދަރިވަރުން ކަަންކަމުގައި ޒިންމާ ނަގަން ފެށުމުން، އެހެން މީހުންނަށާއި ދިރިއުޅޭ މުޖްތަމަޢުއަށް ރަނގަޅު އަސަރެއްކޮށް، ތަހްޒީބީ މުޖްތަމަޢުއެއް އުފެދޭނެއެވެ.
ހަމައެހެންމެ، ޒިންމާދާރުވުމުން، އިޖްތިމާޢީ ޚިދުމަތާއި ދަރުމަވެރި މަސައްކަތްތަކާއި، މުޖުތަމަޢުގެ ދުޅަހެޔޮކަމަށް އެހީތެރިވެދޭ އެހެނިހެން ކަންކަމުގައި ބައިވެރިވުމުގެ ފުރުޞަތު ބޮޑުވެއެވެ. ޒިންމާދާރު ދަރިވަރުންނަށް އެމީހުންގެ މުޖުތަމަޢު އާރޯކޮށް، ރޯޝަންކުރުމުގެ ވިސްނުން އުފެދެއެވެ. ނަތީޖާއަކީ މިއަށްވުރެ އިންސާފުވެރި، އޯގާތެރި، އަދި ދެމެހެއްޓެނިވި މުޖުތަމަޢެއް ބިނާކުރުމަށް ގިނަ އަތްތަކެއް އުފެދިގެން ދިއުމެވެ. ޖަމާޢާތުގެ ބަދަހިކަން އިތުރުވެ، ތަރައްޤީގެ އޮއިވަރު ބާރުވުމެވެ.
