ޕާކިސްތާނާއި އަފްޣާނިސްތާނާ ދެމެދު ވަރުގަދަ ހަމަލާތަކެއް ބަދަލުކުރުމަށްފަހު، 48 ގަޑިއިރަށް ހަމަލާ ބަދަލުކުރުން މެދުކަނޑާލުމަށް ދެ ގައުމުން އެއްބަސްވެއްޖެއެވެ. މި އެއްބަސްވުމާ ހަމައަށް އައީ ދެ ފަރާތުން ދެމުންދިޔަ ހަމަލާތަކުގައި އާންމު ރައްޔިތުން މަރުވެ، ގިނަ އަދަދެއްގެ މީހުންނަށް ޒަހަމްވުމަށް ފަހުގައެވެ.
އަފްޣާނިސްތާނުގައި ވެރިކަންކުރާ ޠާލިބާނުން ބުނެފައިވާ ގޮތުގައި ޕާކިސްތާނުގެ ފައުޖުތަކުން އެންމެ ފަހުން ދިން ހަމަލާތަކުގައި އާންމުންގެ 12 މީހުން ވަނީ މަރުވެފައެވެ. މިއީ 2021 ވަނަ އަހަރު އަފްޣާނިސްތާނުގެ ވެރިކަން ޠާލިބާނުން ހިފި ފަހުން ދެ ގައުމުގެ ދެމެދުގައި ބަދަލުކުރެވުނު އެންމެ ވަރުގަދަ ހަމަލާތަކެވެ.
ޕާކިސްތާނުގެ ހާރިޖީ ވުޒާރާއިން ނެރުނު ބަޔާނެއްގައި ބުނެފައިވާ ގޮތުން، އޮކްޓޯބަރު 15 ވަނަ ދުވަހު ޖީއެމްޓީ ގަޑިން 1300 އިން ފެށިގެން 48 ގަޑިއިރަށް ހަމަލާ ބަދަލުކުރުން ހުއްޓާލުމަށް ވަނީ އެއްބަސްވެފައެވެ. ނަމަވެސް، ޠާލިބާނުންގެ ތަރުޖަމާނު ޛަބީޙުالله މުޖާހިދު ބުނެފައިވަނީ މި އެއްބަސްވުމަކީ ޕާކިސްތާނުގެ އެދުމުގެ މަތިން ވެފައިވާ އެއްބަސްވުމެއް ކަމަށެވެ.
ދެ ގައުމުގެ ދެމެދުގައި މައްސަލަ އުފެދިފައިވަނީ ޕާކިސްތާނުގެ ހަތިޔާރު އެޅި ޖަމާއަތްތަކަށް ނިސްބަތްވާ މީހުންނަށް ހިމާޔަތާއި ރައްކާތެރިކަން ފޯރުކޮށްދިނުން ހުއްޓާލުމަށް ޕާކިސްތާނުން ޠާލިބާނުންނަށް ގޮވާލުމާ ގުޅިގެންނެވެ. ޕާކިސްތާނުން ތުހުމަތުކުރާ ގޮތުގައި، އެ ގައުމުގައި ނިރުބަވެރި އަމަލުތައް ހިންގާ ހަތިޔާރު އެޅި ޖަމާއަތްތަކުގެ މެންބަރުންނަށް ޠާލިބާން ސަރުކާރުން ހިމާޔަތްދެއެވެ. ނަމަވެސް ޠާލިބާނުން މި ތުހުމަތުތައް ވަނީ ދޮގުކޮށްފައެވެ.
ޕާކިސްތާނާއި އަފްޣާނިސްތާނާ ދެމެދު 2,600 ކިލޯމީޓަރުގެ ސަރަހައްދީ ރޮނގެއް ހިއްސާކުރެއެވެ. މި ހަމަނުޖެހުމާ ގުޅިގެން ދެ ގައުމުގެ ދެމެދުގައި ކުރެވޭ ވިޔަފާރިއަށް ވެސް ވަނީ ހުރަސްއެޅިފައެވެ. އަދި ބައިނަލްއަގުވާމީ މުޖުތަމައުން ވެސް ވަނީ މި ކަމާމެދު ކަންބޮޑުވުން ފާޅުކޮށްފައެވެ.
