ޤަޠަރުގެ ކުރީގެ އަމީރު، ޝައިޚް ޙަމަދު ބިން ޚަލީފާ އަލް-ޘާނީ އަވަހާރަވުމާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފުން ހިތާމަ ފާޅުކުރައްވައި ތަޢުޒިޔާ ވިދާޅުވެއްޖެއެވެ. ރައީސް ތަޢުޒިޔާ ވިދާޅުވެފައިވަނީ މީސްމީޑިއާގައި ޙިއްޞާކުރެއްވި މެސެޖެއްގައެވެ.
ރައީސުލްޖުމްހޫރިއްޔާގެ މެސެޖުގައި، ޤަޠަރުގެ މިހާރުގެ އަމީރު ޝައިޚް ތަމީމް ބިން ޙަމަދު އަލް-ޘާނީގެ ބައްޕާފުޅު އަވަހާރަވުމުގެ ހިތާމައިގައި ބައިވެރިވެވަޑައިގެން، ޤަޠަރުގެ ޝާހީ ޢާއިލާއަށާއި ސަރުކާރާއި ރައްޔިތުންނަށް އިޚްލާޞްތެރި ތަޢުޒިޔާ ރައްދުކުރެއްވިއެވެ. ރައީސް ސިފަކުރެއްވި ގޮތުގައި ޝައިޚް ޙަމަދަކީ ދުރުވިސްނޭ، ޙިކުމަތްތެރި ލީޑަރެކެވެ. އަދި އެމަނިކުފާނަށް ސުވަރުގޭގެ ދާއިމީ ނިޢުމަތް މިންވަރުކޮށްދެއްވުން އެދި ދުޢާކުރެއްވިއެވެ.
ޝައިޚް ޙަމަދަކީ އެކި ދާއިރާތަކުން ދިވެހިރާއްޖެއަށް ވެސް ގިނަގުނަ އެހީތަކެއް ވެދެއްވި ބޭފުޅެކެވެ. އެގޮތުން ރާއްޖޭގައި މިސްކިތްތައް ބިނާކުރުމާއި މަރާމާތުކުރުމުގެ މަޝްރޫޢުތައް ހިންގަވާފައިވާއިރު، ލ. ގަމުގައި ހުންނަ ޝައިޚް ޙަމަދު ބިން ޚަލީފާ އާލް ޘާނީ (ހަމަދު ސްކޫލް) އަކީ އެމަނިކުފާނުގެ ދީލަތި އެހީގެ ދަށުން ބިނާކުރެވުނު ފާހަގަކޮށްލެވޭ މުހިންމު ބިނާއެކެވެ.
އުމުރުފުޅުން 74 އަހަރުގައި ޝައިޚް ޙަމަދު އަވަހާރަވިކަން އެ ޤައުމުގެ އަމީރުގެ ރަސްމީ އޮފީހުން އިޢުލާނުކުރީ މިއަދު (12 ޖުލައި 2026) އެވެ. 1995 އިން 2013 އަށް ޤަޠަރުގެ ވެރިކަން ކުރެއްވި ޝައިޚް ޙަމަދަކީ އެ ޤައުމުގެ ޒަމާނީ ތަރައްޤީގެ ބާނީއެވެ. އެމަނިކުފާނުގެ ޒަޢާމަތުގައި ޤަޠަރުގެ އުފެއްދުންތެރިކަން 24 ގުނަ އިތުރުވެ، ތެލާއި ގޭހުގެ ސިނާއަތް ބޮޑުތަނުން ފުޅާވެ، އެ ޤައުމު ބައިނަލްއަޤުވާމީ މައިދާނުގެ ކުރިއަށް ނެރުއްވައިދެއްވިއެވެ.
