މަނަދޫ އަޒީގެ ޅެންހާރު: ރަޙްމަތުގެ ވާރޭ ވެއްސަވާފާނދޭ

*ރާގު! މިކުޑަކުޑަ ލޯބިނާނާއަށް..،،.

އިލާހީ މިޤައުމަށް އަމަނާ އަމާންކަން ދެއްވަވާފާނދޭ
ފިލައިނުމެދާ އުފާފާގަތި ދުވަސްތައް ދައްކަވާފާނދޭ

ނުރައްކާތެރިވި ޠޫފާނާ އެފަދަކޮޅިގަނޑުތަކުގެ ބިރުތައް 2
ދުރަށްލައްވައި ސަލާމަތްކަން މިޤައުމަށް ދެއްވަވާފާނދޭ
ބަލާޔާއެކި މުޞީބާތާ މިޤައުމުން ނެތިކުރައްވާފައި 2
ހަލާކާގެއްލުމުން ވެނަޖާ ދިއުން މިންވަރުކުރައްވާނދޭ
ބިރާ ނާމާންކަމުންފުރިގެންއެވާ ރޯގާތަކާ ބަލިތައް 2
މިރާއްޖޭން ނެތިކުރައްވައި ދީބު ރައްކާތެރިކުރައްވާނދޭ
ތުރާލާވޭންތަކާ މޮޅިޔާ ހިތާމަތަކާ ދުރަށްލައްވައި 2
ފުރާފުރިހަމަކަމާއެކު ޤައުމު ކުރިޔަށް ގެންދަވާފާނދޭ
ޚުލްޤުހެޔޮކަންމަތީ ޤައުމުގެ އަޚުންނާ އުޚްތުނާލައްވައި 2
ޞުލްޙަވެރިކަމުގެ ނަލަފޭރާންތަކުން ޒީނަތްކުރައްވާނދޭ
ވިދާއަލިނޫރު އިސްލާމީ މި ލޮބުވެތި ފަސްމަތީ އަބަދަށް 2
ވިދާލައި ވިދުވަރެއްހެންފެތުރި ރަށްތައް އަލިކުރައްވާނދޭ
ޢަޤީދާ މާތްވިއިސްލާމީ މި ބިމުގައި ދިރިހިނގާނޭހެން 2
ޔަޤީނާ ހިތުގެ އީމާނާ ނިކަން ގަދަފަ ކުރައްވާނދޭ
މިޤައުމަށްއެންމެ ފާގަތިކަންލިބޭ ހުރިހައި ކަމެއްގައިވެސް 2
މިޤައުމުގެ ރައްޔިތުންނަށް ރަނގަޅު ވިސްނުންދެއްވަވާފާނދޭ
މިޤައުމަށް ލިބުނު މިނިވަނަކަން ފިސާރި އަމާންކަމާއެކުގައި 2
މިޤައުމުގެ ފަސްމަތީގައި ތާއަބަދު ދަމަހައްޓަވާފާނދޭ
މިޤައުމުގެ ޢިއްޒަތާ ޝަރަފާ ކަރާމާތް ދެމިހުރުންލައްވައި 2
މިޤައުމުގެ ބިންތަކަށް ރަޙްމަތުގެ ވާރޭ ވެއްސަވާފާނދޭ

30 ނޮވެމްބަރު 2925
*عبدالعزيزقاسم
ލިލީ ނ.މަނަދޫ