އެމެރިކާ މެދުވެރިވެގެން ޖެނީވާގައި ކުރިއަށްދިޔަ ޔޫކްރެއިން އާއި ރަޝިޔާގެ ސުލްހައިގެ ވާހަކަތައް އެދެވޭ ނަތީޖާއަކާ ހަމައަށް ވާސިލު ނުވެވި ނިމިއްޖެއެވެ. ޔޫކްރެއިންގެ ރައީސް ވޮލޮޑިމިއަރ ޒެލެންސްކީ ވަނީ ރަޝިޔާއިން މި މަރުހަލާ ދިގުދަންމަން މަސައްކަތްކުރާ ކަމަށް ތުހުމަތުކުރައްވާފައެވެ. މި ހަނގުރާމައަށް ފަސް އަހަރު ފުރެން ކައިރިވެފައިވާއިރު، އެންމެ ބޮޑު ދެބަސްވުމެއް އުފެދިފައިވަނީ ރަޝިޔާއިން ހިފާފައިވާ ސަރަހައްދުތަކުގެ މައްސަލައިގައެވެ.
ޒެލެންސްކީ ފާހަގަކުރެއްވި ގޮތުގައި ޒަޕޮރީޜިއާ ނިއުކްލިއަރ ޕްލާންޓުގެ ކޮންޓްރޯލާއި އިރުމަތީ ޔޫކްރެއިންގެ ސަރަހައްދުތަކުގެ މައްސަލައަކީ އެންމެ ބޮޑު ހުރަހެވެ. އަސްކަރީ ގޮތުން ހަނގުރާމަ ހުއްޓާލުމާ ބެހޭގޮތުން ބައެއް މަޝްވަރާތައް ކުރެވުނު ނަމަވެސް، ސިޔާސީ ގޮތުން އެއްބަސްވުމަކަށް އައުމަށް އަދިވެސް ވަނީ ދަތިތަކާ ކުރިމަތިވެފައެވެ. ރަޝިޔާގެ މަންދޫބު ވިދާޅުވީ ވާހަކަތައް އުނދަގޫ ނަމަވެސް ކުރިއަށް އޮތް ތަނުގައި އިތުރު ބައްދަލުވުންތައް ބާއްވާނެ ކަމަށެވެ.
އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން ބާރުއަޅަމުންދަނީ ޔޫކްރެއިންއިން ސަރަހައްދުތައް ދޫކޮށްލުމަށްފަހު ސަލާމަތީ ކަށަވަރުކަން ހޯދުމަށެވެ. ނަމަވެސް ޒެލެންސްކީ ވިދާޅުވަނީ ފުރަތަމަ ބޭނުންވަނީ ސަލާމަތީ ކަށަވަރުކަން ކަމަށާއި، ރައްޔިތުން ގަބޫލުނުވާނެ ފަދަ އެއްބަސްވުމެއްގައި ސޮއިނުކުރައްވާނެ ކަމަށެވެ. ވިލާތުގެ ލީޑަރުން ދެކޭގޮތުގައި ޕޫޓިން ސުލްހައަށް އެއްބަސްވާނީ ރަޝިޔާގެ އިގްތިސާދީ ނުވަތަ އަސްކަރީ ހާލަތު ވަރަށް ބޮޑަށް ދަށްވެގެންނެވެ.
