އީރާނާ ދެެކޮޅަށް އެމެރިކާއާއި އިސްރާޢީލު ގުޅިގެން ކުރަމުންދާ ހަނގުރާމަ ކާމިޔާބުވެފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނި ނަމަވެސް، އެމެރިކާގެ އަސްކަރީ މަނަވަރުތަކާއި އެތައް ހާސް މެރިން ސިފައިންނެއް އެ ސަރަހައްދަށް ދަނީ ފޮނުވަމުންނެވެ. މީގެ ސަބަބުން، އީރާނުގެ އިގްތިސާދުގެ މައިނާރު ކަމަށްވާ ޚާރްޖް އައިލެންޑް ހިފުމަށް އެމެރިކާއިން ރާވަމުންދާ ކަމުގެ އަޑުތައް ވަނީ ގަދަވެފައެވެ.
ޚާރްޖް އައިލެންޑަކީ އީރާނުން ބޭރުކުރާ ސާފުނުކުރާ ތެލުގެ ގާތްގަނޑަކަށް 90 އިންސައްތަ ހޭންޑްލް ކުރާ މުހިންމު ތަނެކެވެ. މި ރަށަކީ ބޮޑެތި ތެޔޮ ޓޭންކަރުތަކަށް ގާތްކުރެވޭ ފަދަ ފުން ފެންގަނޑެއް އޮންނަ، އީރާނުގެ އިގްތިސާދަށް ކޮންމެހެން ބޭނުންތެރި މަރުކަޒެކެވެ. ނިރުބަވެރި އިސްރާއީލުގެ އިދިކޮޅު ލީޑަރު ޔާއިރު ލަޕިޑް ވެސް ވަނީ މި ތަން ހަލާކުކޮށްލުމުން އީރާނުގެ އިގްތިސާދު އިނދަޖެހި، ވެރިކަން ވެއްޓޭނެ ކަމަށް ބުނެފައެވެ.
ނަމަވެސް، މިފަދަ އަސްކަރީ އޮޕަރޭޝަނަކީ ނުރައްކާތެރި ކަމެއް ކަމަށް ތަޖުރިބާކާރުން ބުނެއެވެ. ނޭޓޯގެ ކުރީގެ ކޮމާންޑަރު ޖޭމްސް ސްޓަވްރިޑިސް ވިދާޅުވި ގޮތުގައި، މި ރަށަށް ހަމަލާދިނުމުގެ ކުރިން ހޮރްމުޒް ކަނޑުއޮޅިން ދަތުރުކުރާއިރު އީރާނުގެ ޑްރޯންތަކާއި މިސައިލްތަކުގެ ނުރައްކާ ކުރިމަތިވާނެއެވެ. އަދި މި ރަށުގައި މަސައްކަތްކުރާ އެތައް ހާސް މުވައްޒަފުންގެ ރައްކާތެރިކަމާއި، އެމެރިކާގެ ސިފައިންނަށް ލިބިދާނެ ގެއްލުންތަކަކީ ވެސް ބޮޑު ކަންބޮޑުވުމެކެވެ.
މީގެ އިތުރުން، ޚާރްޖް އައިލެންޑް ހިފުމުން އީރާނުން ހޮރްމުޒް ކަނޑުއޮޅި އަލުން ހުޅުވާލާނެ ކަމުގެ އެއްވެސް ޔަގީންކަމެއް ނެތް ކަމަށް ވެސް ތަޖުރިބާކާރުން ފާހަގަކުރެއެވެ. އަދި މިފަދަ އަމަލެއް ދުނިޔޭގެ ގައުމުތަކުން ދެކޭނީ އީރާނުގެ ތެޔޮ ފޭރިގަތުމުގެ ގޮތުގައި ކަމަށް ވެސް ބައެއް ފަރާތްތަކުން ބުނެއެވެ. އީރާނުގެ މަޖިލީހުގެ ރައީސް މުހައްމަދު ބާގިރު ގާލިބާފްވެސް ވަނީ ދުޝްމަނުން އީރާނުގެ ރަށެއް ހިފުމަށް ތައްޔާރުވަމުންދާ ކަމަށް ވިދާޅުވެ އިންޒާރު ދެއްވާފައެވެ.
