ތިބާގެ ވަށައިގެން ތިބޭ އެހެން މީހުން ގައިގައި އެންމެ މަދިރިއެއްވެސް ނުހަފާއިރު، ތިބާ އަބަދު މަދިރި ފޮޅުވަން ޖެހެނީ ކީއްވެގެންތޯ ދުވަހަކުވެސް ހިތަށްއެރި ހެއްޔެވެ؟ ސައިންސުން މިކަމުގެ ޖަވާބު ވަނީ ހޯދައިދީފައެވެ. މީގެ އަސްލު ސަބަބަކީ ތިބާގެ "ލޭ ފޮނިވުމެއް" ނޫނެވެ. އޭގެ ބަދަލުގައި މީގެ ގުޅުން ބޮޑީ ތިބާގެ ހަށިގަނޑުން ގުދުރަތީ ގޮތުން ބޭރުކުރާ ޚާއްޞަ ސިގްނަލްތަކާއެވެ.
މާހިރުން ވިދާޅުވާ ގޮތުގައި، މަދިރިތައް 10 މީޓަރު ދުރުންވެސް ކާބަން ޑައިއޮކްސައިޑްއާއި، ހަށިގަނޑުގެ ހޫނުމިނާއި، ހަށިގަނޑުން ދުވާ ވަސް ދެނެގަނެގެން ޝިކާރައެއް ހޯދަން ފަށައެވެ. އިންސާނުންގެ ގައިގައި ހަފަނީ ހަމައެކަނި އަންހެން މަދިރިއެވެ. އެއީ ބިސް އެޅުމަށް ބޭނުންވާ ޕްރޮޓީން ލޭގެ ތެރެއިން ހޯދުމަށެވެ.
މަދިރި އެންމެ ބޮޑަށް ދަމައިގަންނަ އެއް ކަމަކީ ކާބަން ޑައިއޮކްސައިޑެވެ. އިންސާނަކު ނޭވާލާ ކޮންމެ ފަހަރަކު ބޭރުކުރާ ކާބަން ޑައިއޮކްސައިޑްގެ ސަބަބުން، ޝިކާރަ ހޯދުމަށް މަދިރި ހަރަކާތްތެރިވާން ފަށައެވެ. ކުޑަކުދިންނަށްވުރެ ބޮޑެތި މީހުން ގިނައިން ކާބަން ޑައިއޮކްސައިޑް ބޭރުކުރާތީ، މަދިރި އެމީހުންނަށް ބޮޑަށް ޝައުގުވެރިވެއެވެ. އަދި ހަށިގަނޑު ބޮޑެތި މީހުން ގިނައިން ކާބަން ޑައިއޮކްސައިޑް ބޭރުކޮށް، ހަށިގަނޑުގެ ހޫނުމިން މަތިކޮށް ހުންނާތީ، އެމީހުންނަށް މަދިރި ހެފުމުގެ ފުރުސަތު ބޮޑެވެ.
ހަށިގަނޑުގެ ހޫނުމިނަކީވެސް މުހިންމު ދައުރެއް އަދާކުރާ އެއްޗެކެވެ. މިސާލަކަށް، މާބަނޑު އަންހެނުންގެ ގައިގައި މަދިރި ހެފުމުގެ ފުރުސަތު ދެގުނަ އިތުރެވެ. އެއީ މާބަނޑުވުމުގެ ސަބަބުން މެޓަބޮލިޒަމް އިތުރުވެ، ހަށިގަނޑުގެ ހޫނުމިނާއި ނޭވާލާ މިންވަރު މަތިވާތީއެވެ. އަދި ކަސްރަތުކޮށް ނިމޭ މީހުންނަކީވެސް ވަގުތީ ގޮތުން މަދިރި ދަމައިގަންނަ މެގްނެޓަކަށް ވެދާނެއެވެ. އެއީ ހަށިގަނޑުގެ ހޫނުމިން މަތިވެ، ދާހިއްލައި، ކާބަން ޑައިއޮކްސައިޑް އުފައްދާ މިންވަރު އިތުރުވާތީއެވެ.
އެހެންނަމަވެސް، ސައިންސްވެރިން ވިދާޅުވާ ގޮތުގައި އެންމެ ބޮޑު ސަބަބަކީ ތިބާގެ ހަށިގަނޑުން ދުވާ ޚާއްޞަ ވަހެވެ. އިންސާނުންގެ ހަމުން "ވޮލަޓައިލް އޯގަނިކް ކޮމްޕައުންޑްސް" ގެ ގޮތުގައި އެތައް ސަތޭކަ ކެމިކަލެއް ވައިގެ ތެރެއަށް ބޭރުކުރެއެވެ. މިއީ ހަމުގައި ހުންނަ ބެކްޓީރިއާތަކުން ފެޓީ އެސިޑް ފަދަ މާއްދާތައް މުގުރާލުމުން އުފެދޭ އެއްޗެހިތަކެކެވެ. މަދިރިތަކަކީ މި ކެމިކަލްތަކަށް ވަރަށް ނާޒުކު އެއްޗެކެވެ. އަދި އެމީހުން ހަފާނީ ކާކަށްކަން ނިންމުމުގައި މި ކެމިކަލްތައް ބޭނުންކުރެއެވެ.
ރޮކްފެލާ ޔުނިވާސިޓީގެ ދިރާސާއަކުން ދައްކާ ގޮތުގައި، ހަމުގައި "ކާބޮކްސިލިކް އެސިޑް" ގިނައިން ހުންނަ މީހުން ގައިގައި އެހެން މީހުންނަށްވުރެ މާ ގިނައިން މަދިރި ހެފުން އެކަށީގެންވެއެވެ. މި ދިރާސާގައި ބައިވެރިވި މީހުންގެ ތެރެއިން މަދިރި އެންމެ ގިނައިން ހެފި މީހާއަށް، އެންމެ މަދުން މަދިރި ހެފި މީހާއަށްވުރެ 100 ގުނަ އިތުރަށް މަދިރި ޝައުގުވެރިވިއެވެ. އަދި މި ތަފާތަކީ ދިރިއުޅުމުގެ އާދަކާދައަށްވުރެ ބޮޑަށް، ބަޔޮލޮޖީ ނުވަތަ އިންސާނާގެ އުފެދުމާ ގުޅިފައިވާ ކަމެއްކަންވެސް ދިރާސާއިން އެނގުނެވެ.
ޖެނެޓިކްސް ނުވަތަ ވާރުތަވާ ސިފަތަކަކީވެސް މީގައި ދައުރެއް އޮތް ކަމެކެވެ. އެއްމާބަނޑު ދެކުދިން ބޭނުންކޮށްގެން ހެދި ދިރާސާތަކުން އެނގުނު ގޮތުގައި، އެއްމާބަނޑު ކުދިން ގައިގައި މަދިރި ހަފާ މިންވަރު އެއްވަރެވެ. ނަމަވެސް އެއްމާބަނޑު ނޫން ދެބެންގެ މެދުގައި މިކަމުގައި ބޮޑެތި ތަފާތުތަކެއް ހުރެއެވެ. މީގެ އިތުރުން، ބައެއް މީހުންނަށް ގިނައިން މަދިރި ހަފާ ކަމަށް ހީވަނީ، އެމީހުންގެ ދިފާއީ ނިޒާމު މަދިރި ހެފުމުގެ އިހުސާސަށް މާ ބޮޑަށް އިޖާބަދީ، ހަފާ ތަންތަން މާ ބޮޑަށް ފޮޅި ކަހާތީ ކަމަށްވެސް ސައިންސްވެރިން ގަބޫލުކުރެއެވެ.
ގޭގައި ކުރާ ބައެއް ފަރުވާތަކުން (މިސާލަކަށް ލޮނުމެދު ކެއުން ނުވަތަ ވިޓަމިން ބީ ބޭނުންކުރުމުން) މަދިރި ދުރުކޮށްދޭ ކަމަށް ބުނި ނަމަވެސް، މީގެ އެއްވެސް ސައިންޓިފިކް ހެއްކެއް ނެތެވެ. އޭގެ ބަދަލުގައި މާހިރުން ލަފާދެއްވަނީ މަދިރި ދުރުކޮށްލާ ލޯޝަން ބޭނުންކުރުމަށާއި، އަތްދިގު އެއްޗެހި ލުމަށެވެ. އަދި ދާހިއްލުމުން މިފަދަ ލޯޝަންތައް އަލުން އުނގުޅުމަށްވެސް އިރުޝާދު ދެއެވެ. ދިރާސާތަކުން ދައްކާ ގޮތުގައި ބައެއް މީހުންނަކީ ތަބީޢީގޮތުން މަދިރި މާބޮޑަށް ދަމައިގަންނަ ބަޔަކަށް ވީނަމަވެސް، މި ގަދަފަދަ ސޫފިތަކަށް ނުފެނި ސަލާމަތްވެވޭނެ މީހަކު މަދުވާނެތާއެވެ. އެހެންކަމުން، ތިމާއަކީ މަދިރި މާބޮޑަށް ހަފައިގަންނަ މީހެއް ކަމަށް ގަބޫލުކުރެވުނަސް ނުވަތަ ނޫންކަމަށް ވިޔަސް، އެންމެ ރަނގަޅު ދިފާޢަކީ ރައްކާތެރިކަމުގެ ފިޔަވަޅުތައް އެޅުމެވެ.
