ހައްދުފަހަނަ އަޅާފައިވާ އަނިޔާވެރި ޔަހޫދީންގެ ލާއިންސާނީ އަނިޔާތައް ލިބެމުންދާ ފަލަސްތީނުގެ ރައްޔިތުންނާއެކު ތިބިކަން ހާމަކޮށްދިނުމުގެ ގޮތުން ދިވެހި ކަނބަލުންގެ ޚާއްސަ ހިނގާލުމެއް މާލޭގައި ބާއްވައިފިއެވެ.
މިޙަރަކާތް ބާއްވާފައިވަނީ ހުކުރުދުވަހު ހަވީރުއެވެ. ބޭއްވި ގިނަ އަދަދެއްގެ ކަނބަލުން ބައިވެރިވި މި ހިނގާލުމަކީ އަމިއްލަ ޖަމިއްޔާއެއްކަމަށްވާ "މޮމްސް އެއިޑް" ޖަމިއްޔާއިން އިސްނަގައިގެން ކުރިއަށްގެންދިޔަ ހިނގާލުމެވެ.
މާލޭގެ ރަސްފަންނު ސަރަޙައްދުން ފެށި ހިނގާލުމުގައި ވަނީ ހައްދުފަހަނަ އަޅާފައިވާ އިސްރާއީލުން ފަލަސްޠީނަށް ދެމުންދާ ޙަމަލާތަކުގައި، ޝަހީދުކޮށްލާފައިވާ ކުޑަކުދިންގެ ހަނދާން އާކޮށްފައެވެ. އަދި ޙަމަލާތައް ހުއްޓާލާ، ފަލަސްޠީނުގެ މިނިވަކަމަށް ވަނީ ގޮވާލާފައެވެ. އެގޮތުން މިފަދަ ލިޔުންތަކާއި ފަލަސްޠީނުގެ ޙާލަތާމެދު އަޑުއުފުލުމަށް ބެނާތަކާއި ލިޔުންތައް އަދި ކުރެހުންތައް ވަނީ ބޭނުންކޮށްފައެވެ.
ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ލާއިންސާނީ ޢަމަލުތައް ހުޓާލުމަށް ގޮވާލާ، ރާއްޖެއިން އަންނަނީ ބޮޑެތި ގިނަ ހަރަކާތްތަކެއް ހިންގަމުންނެވެ. އެގޮތުން މާލެއާއި އަތޮޅުތަކުގެ ރަށްތަކުގައިވެސް އަންނަނީ، އަޑު އުފުލާ އަދި މާލީ އެހީތެރިކަން ފޯރުކޮށްދިނުމަށް ފަންޑު ފޮށި ބަހައްޓައިގެން ފައިސާ ހޯދުމުގެ ހަރަކާތްތައްވެސް ހިނގަމުންނެވެ. އެގޮތުން ޓެލެތޯންއާއި، ތަކެތި ވިއްކައިގެން ފައިސާ ހޯދުމާއި ފަންޑު ފޮށި ބެހެއްޓުމުގެ އިތުރުން، އަމިއްލަ ޖަމިއްޔާތަކާއި ކުންފުނިތަކުންވެސް އަންނަނީ އެކިގޮތްގޮތުން އެހީތެރިކަން ފޯރުކޮށްދެމުންނެވެ.
މި ހިނގާލުން ބާއްވާފައިވަނީ، އޮކްޓޫބަރު 7 ވަނަ ދުވަހުން ފެށިގެން ޔަހޫދީ ފައުޖުތަކުން ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ގަތުލުއާންމާ ގުޅިގެންނެވެ. އެ އުދުވާންތަކުގައި ޝަހީދު ކޮށްލާފައިވާ ފަލަސްޠީނުގެ ރައްޔިތުންގެ ޢަދަދު ވަނީ 9,061 އަށް އުފުލިފައެވެ. އޭގެ ތެރޭގައި ކުށެއް ނެތް 3,760 ކުޑަކުދިންނާއި 2,326 އަންހެނުންގެ އިތުރުން އުމުރުން ދުވަސްވީ އެތަކެއް ސަތޭކަ ބަޔަކު ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު ވަނީ 32,000 އަށް އުފުލިފައެވެ. ޔަހޫދީންގެ މި ގަތުލުއާންމު ހިންގަމުން ދަނީ އެމެރިކާގެ އެއްބާރުލުމާއި އެހީތެރިކަމާ އެކުގައެވެ.
