ގިނަ މައިންބަފައިން ގަބޫލުކުރާ ގޮތުގައި އެމީހުންގެ ދަރިން އާޓިފިޝަލް އިންޓެލިޖެންސް ނުވަތަ އޭއައި ބޭނުންކުރާ ގޮތް އެމީހުންނަށް ވަރަށް ރަނގަޅަށް އެނގެއެވެ. ނަމަވެސް، އަލަށް ކުރެވުނު ދެ ބޮޑު ދިރާސާއަކުން ދައްކާ ގޮތުގައި ހަގީގަތް މިއާ މުޅިން ތަފާތެވެ. ދިރާސާވެރިންނަށް ފެނުނު ގޮތުގައި، ސްކޫލް މަސައްކަތްތައް ނިންމުމުން ފެށިގެން ނަފްސާނީ އެހީތެރިކަން ހޯދުމާ ހަމައަށް، އެތައް މިލިއަން ކުދިންނެއް އޭއައި ބޭނުންކުރަމުންދަނީ އެކުދިންގެ މައިންބަފައިންނަށް އަންދާޒާވެސް ނުކުރެވޭ ނުވަތަ އެއްވެސް ވަރަކަށް ނޭނގޭ ގޮތްގޮތަށެވެ.
މި ހޯދުންތައް ބިނާވެފައިވަނީ އެމެރިކާގެ ޕިއު ރިސާޗް ސެންޓަރާއި ކުޑަކުދިންގެ ހައްގުތަކަށް މަސައްކަތްކުރާ ޖަމިއްޔާއެއް ކަމަށްވާ ކޮމަން ސެންސް މީޑިއާއިން ކުރިއަށް ގެންދިޔަ ސާވޭތަކެއްގެ މައްޗަށެވެ. މިއިން ހާމަވަނީ ޒުވާނުންގެ ދިރިއުޅުމުގެ ބަޔަކަށް އޭއައި ވަމުންދާއިރު، މައިންބަފައިންނާއި ދަރިންގެ މެދުގައި އޮތް މުއާމަލާތްކުރުމުގެ ފަރަގު ބޮޑުވަމުންދާ ކަމެވެ.
ޕިއު ރިސާޗް ސެންޓަރުން ބުނާ ގޮތުގައި، އެމެރިކާގެ 13 އަހަރާއި 17 އަހަރާ ދެމެދުގެ ކުދިންގެ ތެރެއިން 64 އިންސައްތަ ކުދިން އޭއައި ޗެޓްބޮޓް ބޭނުންކުރާ ކަމަށް ބުނާއިރު، އެކުދިން މި ޓެކްނޮލޮޖީ ބޭނުންކުރާ ކަމަށް ގަބޫލުކުރަނީ އެންމެ 51 އިންސައްތަ މައިންބަފައިންނެވެ. މިއަށްވުރެ ބޮޑަށް ކަންބޮޑުވާންޖެހޭ ކަމަކީ، ކޮންމެ 10 މައިންބަފައިންގެ ތެރެއިން 4 މީހަކު، ދަރިންނާއެކު އޭއައިއާ ބެހޭގޮތުން ދުވަހަކުވެސް ވާހަކަދައްކާފައި ނުވާކަމަށް އެއްބަސްވުމެވެ.
ދިރާސާވެރިން ބުނާ ގޮތުގައި، މި މުއާމަލާތްތެރިކަން ނެތުމުގެ ސަބަބުން، އެތައް ކުދިންނެއް ދަނީ އެއްވެސް އިރުޝާދެއް ނެތި ނުރައްކާތެރިވެދާނެ ފަދަ ބާރުގަދަ އޭއައި ނިޒާމުތައް ބޭނުންކުރަމުންނެވެ.
"އޭއައިއާ މެދު ކަންތައްވަމުންދާ ގޮތް ކަމަށް މައިންބަފައިން ގަބޫލުކުރާ ގޮތާއި، ކުދިން ހަގީގަތުގައި ކުރާ ކަންތައްތަކާ ދެމެދު ބޮޑު ފަރަގެއް އެބައޮތް،" ޕިއު ރިސާޗް ސެންޓަރުގެ މެނޭޖިންގ ޑިރެކްޓަރު މޮނިކާ އެންޑަސަން ވިދާޅުވިއެވެ.
ހޯމްވޯކް ހެދުމަކީ އޭއައި އެންމެ ގިނައިން ބޭނުންކުރާ އެއް ކަންތައް ކަމުގައި ވީނަމަވެސް، ލަފާ ހޯދުމަށާއި، މުނިފޫހިފިލުވުމަށާއި، އަދި ނަފްސާނީ އެހީތެރިކަން ހޯދުމަށްވެސް ކުދިން ޗެޓްބޮޓްތަކަށް ބަރޯސާވާ މިންވަރު އިތުރުވަމުންދާކަން ދިރާސާތަކުން ދައްކައެވެ. ގާތްގަނޑަކަށް 12 އިންސައްތަ ކުދިން އަމިއްލަ ކަންކަމުގައި ލަފާ ހޯދުމަށް ނުވަތަ ނަފްސާނީ އެހީތެރިކަމަށް އޭއައި ބޭނުންކުރާ ކަމަށް ރިޕޯޓްކޮށްފައިވާއިރު، 16 އިންސައްތަ ކުދިން ބުނީ އާދައިގެ ވާހަކަދެއްކުމަށް ޗެޓްބޮޓް ބޭނުންކުރާ ކަމަށެވެ.
ނަފްސާނީ ބަލިތަކާ ބެހޭ މާހިރުން އިންޒާރު ދެއްވާ ގޮތުގައި، އޭއައި އަކީ ދުވަހަކުވެސް އިންސާނީ ގުޅުންތަކުގެ ބަދަލުގައި ބޭނުންކުރެވޭނެ އެއްޗަކަށް ވެގެން ނުވާނެއެވެ. އެމެރިކަން ސައިކޮލޮޖިކަލް އެސޯސިއޭޝަނުން މައިންބަފައިންނަށް އިރުޝާދު ދެނީ، ކުދިން އޭއައި އަކީ އެކުދިންގެ "އެންމެ ގާތް އެކުވެރިޔާ" ކަމަށް ބެލުމާއި، އާއިލާއާއި ރައްޓެހިންނާ ދުރުވުމާއި، ނުވަތަ ޗެޓްބޮޓް ބޭނުން ނުކުރެވުމުން މާޔޫސްވުން ފަދަ ނުރައްކާތެރި ނިޝާންތަކަށް ސަމާލުވުމަށެވެ. އަދި އަމިއްލައަށް މަރުވުން ނުވަތަ ނަފްސާނީ ބޮޑެތި މައްސަލަތަކާ ބެހޭގޮތުން އޭއައިއާ ވާހަކަދައްކާ ކޮންމެ މީހަކަށް ވަގުތުން ފަންނީ އެހީތެރިކަން ލިބެންޖެހޭނެ ކަމަށްވެސް އެ ޖަމިއްޔާއިން ބާރުއަޅައެވެ.
މި ކަންބޮޑުވުންތައް ހުރި ނަމަވެސް، ގިނަ ކުދިންނަށް އޭއައިގެ އުނިސިފަތައް އެނގޭ ކަމަށް ފެނެއެވެ. ސާވޭގައި ބައިވެރިވި ބައެއް ކުދިން ބުނި ގޮތުގައި، އެކުދިން ޗެޓްބޮޓްތަކުގެ ޖަވާބުތަކަށް ބަލަނީ ވަރަށް ފަރުވާތެރިކަމާއެކުގައެވެ. އެއީ އޭއައި އަކީ އިތުބާރު ހުރި އިރުޝާދެއް ދިނުމުގެ ބަދަލުގައި، ބޭނުންކުރާ މީހާ އަޑުއަހަން ބޭނުންވާ ކަހަލަ ވާހަކައެއް ބުނެފާނެ އެއްޗެއްކަން އެކުދިން ގަބޫލުކުރެއެވެ.
މި ދިރާސާއިން ތައުލީމީ ދާއިރާގައި އޭއައި ބޭނުންކުރުމާ މެދު ގެންގުޅޭ ތަފާތު ވިސްނުންތައްވެސް ހާމަވިއެވެ. ދެބައިކުޅަ އެއްބަޔަށްވުރެ ގިނަ މައިންބަފައިން ސްކޫލް މަސައްކަތްތަކަށް އޭއައި ބޭނުންކުރުމަކީ އަޚްލާގީ ގޮތުން ގޯސް ކަމެއްގެ ގޮތުގައި ސިފަކުރިއިރު، ހަމަ އެ އަދަދަށް ކުދިން ދެކެނީ އެއީ ޒިންމާދާރުކަމާއެކު ބޭނުންކޮށްފިނަމަ އުނގެނުމަށް އެހީތެރިވެދޭ އާދަޔާޚިލާފު ވަސީލަތެއްގެ ގޮތުގައެވެ. ކޮންމެ 10 ދަރިވަރަކުން އެކަކު ސްކޫލްގެ ހުރިހާ ނުވަތަ ގިނަ މަސައްކަތްތަކަށް އޭއައި ބޭނުންކުރާ ކަމަށް އެއްބަސްވާއިރު، ގިނަ ކުދިން ބުނަނީ މި ޓެކްނޮލޮޖީ ބޭނުންކުރަނީ މަކަރު ހެދުމުގެ ބަދަލުގައި މައުލޫމާތު ހޯދުމަށާއި، ހިސާބު ފަރިތަކުރުމަށާއި، ލިޔުންތެރިކަމަށް އެހީތެރިވުމަށް ކަމަށެވެ.
ޖުމްލަގޮތެއްގައި ދިރާސާވެރިން ބުނަނީ، ގިނަ މައިންބަފައިންނަށް ހީކުރެވޭ ވަރަށް ވުރެ މާ ހަލުވިކަމާއެކު، ޒުވާނުންގެ ދިރިއުޅުމުގެ ތެރެއަށް އޭއައި ވަދެ ހަރުލަމުންދާ ކަމަށެވެ. ޓެކްނޮލޮޖީ މަނާކުރުމުގެ ބަދަލުގައި، އޭއައި ބޭނުންކުރާ ގޮތާ ބެހޭގޮތުން އާއިލާގެ ތެރޭގައި ގަވާއިދުން ވާހަކަދައްކަން ފެށުމަށް މާހިރުން ލަފާދެއެވެ. އަދި އޮޅުންބޮޅުންތައް ބޮޑެތި މައްސަލަތަކަށް ބަދަލުވުމުގެ ކުރިން، ކަންކަމާ މެދު ފާޑުވެރިކޮށް ވިސްނުމާއި، ޒިންމާދާރު ގޮތެއްގައި ޑިޖިޓަލް ވަސީލަތްތައް ބޭނުންކުރުމުގެ އާދަ އަށަގަންނުވައި، އެކަކު އަނެކަކަށް ކަންކަން ހިއްސާކުރުމަށް ބާރުއެޅުމަށްވެސް މާހިރުން އިރުޝާދުދެއެވެ.
