ޣައްޒާގައި ހަނގުރާމަ ހުއްޓާލުމަށް އެއްބަސްވެފައިވީ ނަމަވެސް، އިންޓަނޭޝަނަލް ކޯޓް އޮފް ޖަސްޓިސް (އައި.ސީ.ޖޭ) ގައި އިސްރާއީލާ ދެކޮޅަށް ހުށަހަޅާފައިވާ ޖެނޮސައިޑްގެ މައްސަލައަށް އެއްވެސް ބަދަލެއް ނާންނާނެ ކަމަށް ސައުތު އެފްރިކާގެ ސަރުކާރުން ބުދަ ދުވަހު ބުނެފިއެވެ.
ސައުތު އެފްރިކާގެ މިނިސްޓްރީ އޮފް އިންޓަނޭޝަނަލް ރިލޭޝަންސް އެންޑް ކޯޕަރޭޝަންއިން ބުނި ގޮތުގައި، މި މައްސަލައިގެ މަޤްޞަދަކީ އިންސާނީ ޙައްޤުތަކާ ޚިލާފު ޢަމަލުތައް ވަގުތީގޮތުން ހުއްޓާލުން ނޫން ކަމަށާއި، އެފަދަ ޢަމަލުތައް ތަކުރާރުވިޔަ ނުދިނުމެވެ. އަދި ހަނގުރާމަ ހުއްޓާލުމަކުން ކުރިން ހިންގާފައިވާ ޖަރީމާތައް ފޮހެވިގެން ނުދާނެ ކަމަށްވެސް އެ މިނިސްޓްރީން ވަނީ ފާހަގަކޮށްފައެވެ.
އިސްރާއީލުން ޣައްޒާގައި ހިންގާފައިވާ އަނިޔާވެރި ޢަމަލުތަކާ ގުޅިގެން ޒިންމާދާރުކުރުވުމަކީ ކޮންމެހެން މުހިންމު ކަމެއްކަމަށް ސައުތު އެފްރިކާގެ ސަރުކާރުން ވަނީ އިތުރަށް ބާރުއަޅާފައެވެ. އަދި ބައިނަލްއަޤްވާމީ ޢަދުލު އިންސާފު ޤާއިމުކުރުމަށްޓަކައި، މިފަދަ ޖަރީމާތައް ހިންގާ ފަރާތްތައް ޒިންމާދާރުކުރުވުމަކީ ހަނގުރާމަ ހުއްޓާލުމަށް ވާ އެއްބަސްވުންތަކާއި ސިޔާސީ މަޝްވަރާތަކަށްވުރެ މުހިންމު ކަމެއް ކަމަށްވެސް ވަނީ ފާހަގަކޮށްފައެވެ.
ސައުތު އެފްރިކާއިން އައި.ސީ.ޖޭގައި މި މައްސަލަ ކުރިއަށް ގެންދިއުމުގައި ދެމި އޮންނާނެކަމަށް އަލުން ވަނީ ކަށަވަރުކޮށްދީފައެވެ. އަދި މި މައްސަލައަކީ އިންސާނިއްޔަތާ ދެކޮޅަށް ހިންގާފައިވާ ޖަރީމާތަކަށް ޢަދުލު އިންސާފު ހޯދައިދިނުމަށް ކުރެވޭ މަސައްކަތެއްގެ ގޮތުގައި ދެކޭކަންވެސް ވަނީ ހާމަކޮށްފައެވެ.
