އެމެރިކާގެ އެންމެ ނުފޫޒުގަދަ އަދި އެންމެ ކުރީގެ އެއް އަދަބީ ޖަމްޢިއްޔާ ކަމަށްވާ "ޕެން އެމެރިކާ"ގެ ރައީސްގެ މަޤާމުގައި ހުންނެވި އިތިއޯޕިއާ-އެމެރިކާގެ މަޝްހޫރު ބަޠަލު ޑިނޯ މެންގިސްޓޫ، އެ މަޤާމާ ޙަވާލުވެވަޑައިގަތްތާ އެންމެ 7 މަސްދުވަހުގެ ތެރޭގައި މަޤާމުން އިސްތިއުފާދެއްވައިފިއެވެ.
މެންގިސްޓޫ މަޤާމުން އިސްތިއުފާދެއްވީ އިސްރާއީލީންނާއި ޔަހޫދީ އެމެރިކާނުންނާ އަޅާބަލާއިރު، ފަލަސްޠީނުގެ ލިޔުންތެރިންނާއި ރައްޔިތުންނާމެދު ޕެން އެމެރިކާއިން ގެންގުޅޭ ތަފާތުކުރުންތަކާއި ބޭއިންސާފު ސިޔާސަތުތަކާ ގުޅިގެންނެވެ.
މި ޚިޔާލުތަފާތުވުންތައް ބޮޑުވީ، ޣައްޒާގައި އިސްރާއީލުން ހިންގަމުންދާ ޤަތުލުޢާންމުގެ ސަބަބުން އިސްރާއީލާއި ޔަހޫދީ ލިޔުންތެރިންގެ ނަފްސާނީ ދުޅަހެޔޮކަމަށް ކޮށްފައިވާ އަސަރުތަކާ ބެހޭގޮތުން ޕެން އެމެރިކާއިން ރިޕޯޓެއް ޝާއިޢުކުރުމާ ގުޅިގެންނެވެ. އެ ރިޕޯޓުގައި ޔަހޫދީ ލިޔުންތެރިންނަށް ވަޒީފާއާއި ފުރުޞަތުތައް ގެއްލެމުންދާ ކަމަށް ބުނެފައިވެއެވެ.
މެންގިސްޓޫ އޭނާގެ އިންސްޓަގްރާމް ޕޯސްޓެއްގައި ވިދާޅުވީ، މިއީ ހަމައެކަނި ޚިޔާލުތަފާތުވުމެއް ނޫން ކަމަށާއި، ޕެން އެމެރިކާއިން ޚިޔާލު ފާޅުކުރުމުގެ މިނިވަންކަން ހަމަހަމަކަމާއެކު ދިފާޢުކުރުމުގައި ދެމެހެއްޓެނިވި ގޮތެއްގައި ފެއިލްވަމުންދާ ކަމަށެވެ. އަދި ފަލަސްޠީނުގެ ޙައްޤުގައި ހިންގާ ބޮއިކޮޓް ކުރުމުގެ ޙަރަކާތްތަކަކީ އެމެރިކާގެ ޤާނޫނުއަސާސީގެ ފުރަތަމަ އިޞްލާޙުގެ ދަށުން ޙިމާޔަތްލިބިގެންވާ ޚިޔާލު ފާޅުކުރުމުގެ މިނިވަންކަމެއް ކަމަށްވާއިރު، އެކަން ހުއްޓުވުމަށް ޕެން އެމެރިކާއިން މަސައްކަތްކުރާ ކަމަށް އޭނާ ތުހުމަތުކުރެއްވިއެވެ.
ފަލަސްޠީނުގެ ޙައްޤުގައި މަސައްކަތްކުރާ "ރައިޓާސް އަގެއިންސްޓް ދަ ވޯ އޮން ޣައްޒާ" ޖަމްޢިއްޔާއިން ވަނީ މެންގިސްޓޫގެ އިސްތިއުފާއަށް މަރުޙަބާ ކިޔާފައެވެ. އެ ޖަމްޢިއްޔާއިން ބުނި ގޮތުގައި، ޕެން އެމެރިކާއިން ފަލަސްޠީނުގެ ޔުނިވަރސިޓީތަކާއި، ސަގާފީ މަރުކަޒުތައް ސުންނާފަތިކޮށް، ޢިލްމުވެރިންނާއި ލިޔުންތެރިން މަރަމުންދާ ދިއުމާ، ޔަހޫދީ ލިޔުންތެރިންނަށް ދިމާވާ ބަހުގެ ބަހުސްތަކާ އެއްވަރުކުރަން އުޅުމަކީ ބަލައިގަނެވޭނެ ކަމެއް ނޫނެވެ.
އދ. އާއި ބައިނަލްއަޤުވާމީ މާހިރުން އެއްބަސްވާ ގޮތުގައި އިސްރާއީލުން ޣައްޒާގައި ހިންގަމުންދަނީ ނަސްލު ނައްތާލުމުގެ (ޖެނޮސައިޑް) ޢަމަލުތަކެކެވެ. ރަސްމީ ހިސާބުތަކުން ދައްކާގޮތުގައި 2023 އޮކްޓޯބަރު 7 ގެ ފަހުން މިހާތަނަށް ފަލަސްޠީނުގެ 73,231 އަށްވުރެ ގިނަ ރައްޔިތުން ވަނީ ޝަހީދުކޮށްލާފައެވެ.
