ރައްޔިތުންގެ މަޖިލީހުގެ މެމްބަރުންގެ ސާފު އައުލަބިއްޔަތުން މަޖިލީހުގެ ރައީސާއި ނައިބް ރައީސްގެ އިތުބާރު ނެތްކަމަށް ސޮއިކޮށް ހުށަހެޅުމުން ރީތި ގޮތަކީ އަވަހަށް އިސްތިއުފާ ދެއްވުން ކަމުގައި ރައްޔިތުންގެ މަޖިލީހުގެ މެޖޯރިޓީ ލީޑަރު ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި އިންތިޚާބުތަކާއި ބެހޭ ޢާންމު ޤާނޫނަށް ހުށަހެޅުއްވި އިސްލާހަށް ވާހަކަ ދައްކަވަމުން އަސްލަމް ވިދާޅުވީ، މަޖިލީހުގެ މިއަދުގެ ޖަލްސާ ކުރިއަށް ގެންދިއުމަށް އެމްޑީޕީގެ ޕީޖީ ގްރޫޕުން ޖާގަ ދެނީކީ އެއްގޮތަކަށްވެސް މަޖިލީހުގެ ގަވާއިދާއި އެއްގޮތަށް ދާތީ ނޫންކަމަށެވެ. އެއީ ކިރިޔާވެސް މަޖިލީހުގެ މަސައްކަތެއް ކުރެވޭނެ ޖާގަ އޮތްނަމަ އެޖާގައަކަށް އެމްޑީޕީން ހުރަސް ނޭޅުމަަށް ކަމަށް އަސްލަމް ވިދާޅުވިއެވެ.
އަސްލަމް ވިދާޅުވީ މަޖިލީހުގެ ރައީސާއި ނައިބު ރައީސްގެ އިތުބާރު ނެތް މައްސަލައެއް ހުށަހެޅި ނޯޓިސް ހަމަވެފައިވާއިރުވެސް އެމައްސަލަ ކުރިއަށް ނުގެންދިއުމަކީ ސީދާ މަޖިލީހުގެ ގަވާއިދާއި ޚިލާފަށް ހިންގާކަމުގެ ހެއްކެއް ކަމަށެވެ. މަޖިލީހުގެ ރިޔާސަތުގެ އިތުބާރު ނެތް މައްސަލަ ހުށަހެޅިފައި އޮވެ މުއްދަތު ހަމަވުމުން އެހެން މަސައްކަތްތައް ގެންދެވޭނީ އެމައްސަލަތައް ނިންމުމަށްފަހު ކަމަށް އަސްލަމް ވިދާޅުވިއެވެ.
މަޖިލިސް ބާރުވެރިކަމުގައި ތަޅުއަޅުވައިގެން އޮތުމަކީ ބާރުވެރިކަމަކަށް ނުވާނެ. އިތުބާރު ނެތް މީހުންގެ އިތުބާރެއް ނެތް. އެއީ ސާފު މައްސަލައެއް. އިތުބާރު ނެތް މީހުންގެ އިތުބާރެއް ނެތް. މަޖިލީހުގެ ގަވާއިދަށް ބައްލަވާލެއްވުމެއް ނެތް. ޤާނޫނު އަސާސީއަށް ބައްލަވާ ލެއްވުމެއްނެތް. ޤާނޫނަކަށް ބައްލަވާލެއްވުމެއްނެތް.
– އަސްލަމް ވިދާޅުވިއެވެ.
އަސްލަމް މިހެން ވިދާޅުވެފައިވާއިރު މަޖިލިސް ރައީސް މުހައްމަދު ނަޝީދު ވިދާޅުވީ ރައްޔިތުންގެ މަޖިލީހުގެ ރައީސްކަމުގެ މަޤާމުން މިވަގުތު އިސްތިއުފާދިނުމަކީ، ރާއްޖެއާއި، ސިޔާސީ ޕާޓީތައް އަދި ރައްޔިތުންގެ މަޖިލީހަށްވެސް އެންމެ ރަނގަޅު ގޮތް ނޫންކަމަށެވެ. ރައްޔިތުންގެ މަޖިލީހުގެ މަސައްކަތްތައް ހުއްޓި މަޖިލީހުގެ އިތުރު ޖަލްސާއެއް މިދައުރުގައި ދެން ނުބޭއްވޭނެކަމަށް ބެލެވޭތީ މަޖިލިސް ރައީސް ވަނީ ރައީސުލްޖުމްހޫރިއްޔާއާއި އެކަން ހިއްސާ ކުރައްވާފައެވެ.
މަޖިލީހުގެ އިދާރާގައި ނޫސްވެރިންނާއި ބައްދަލުކުރައްވާ ވާހަކަފުޅު ދައްކަވަމުން ރައީސް ނަޝީދު ވަނީ މަޖިލީހުގެ ރައީސާއި، ނައިބު ރައީސްގެ އިތުބާރުނެތް ކަމުގެ މައްސަލަ މަޖިލީހަށް ހުށައަޅާފައިވަނީ މަޖިލިސް ހުއްޓުވުމުގެ ނިޔަތުގައިކަމަށް ވިދާޅުވެފައެވެ. ރައިތުބާރު ނެތްކަމުގެމައްސަލަ ހުށައެޅުއްވުމާއި ގުޅިގެން ރައީސް ނަޝިދު ވަނީ ރިޔާސަތު ބެލެހެއްޓެވުމަށް އުޒުރުވެރިވެވަޑައިގަންނަވާކަން ހާމަކުރައްވާފައެވެ. އީސް ނަޝީދު ވިދާޅުވީ ރިޔާސަތާ ދުރަށް ވަޑައިގަންނަވަން ނިންމެވީ، ދުނިޔޭގެ ބެސްޓު ޕްރެކްޓިސްއަށް ބެއްލެވުމަށްފަހުގައި ކަމަށެވެ. ނަމަވެސް މަޖިލީހުގެ ރައީސްކަމުގެ މަޤާމުން އިސްތިއުފާ ދެއްވުމަކީ މިހާލަތަށް ބަލާއިރު ރަނގަޅު ކަމެއް ނޫންކަމަށް ނަޝީދު ވިދާޅުވިއެވެ.
