ސަރުކާރުގެ އެކި މަޤާމުތައް ފުރުއްވަމުންދާ ޖުމްހޫރީ ޕާޓީގެ މެމްބަރުންތަކެއް ވެރިކަން ކުރާ މައި ޕާޓީ އެމްޑީޕީއާއި ގުޅިއްޖެއެވެ.
މީގެ ތެރޭގައި ޖުމްހޫރީ ޕާޓީގެ ކުރީގެ ސެކްރެޓަރީ ޖެނަރަލް އަދި ރައީސް އޮފީހުގެ މިނިސްޓަރު އަހުމަދު ސަމީރު އާއި އެމްޑަބްލިއުއެސްސީގެ މެނޭޖިން ޑިރެކްޓަރު ހަސަން ޝާހު ހިމެނެއެވެ. އެމްޑީޕީން މިރޭ ކުރެއްވި ޓުވީޓެއްގައި ޖޭޕީގެ ކުރީގެ ގިނަ މެންބަރުންތަކެއް އެ ޕާޓީ އަށް ސޮއި ކުރައްވާފައިވާ ކަމަށެވެ.
އެ ބޭފުޅުންގެ ފޯމާ ހަވާލުވެވަޑައިގެންނެވީ ރައީސް އިބްރާހިމް މުހައްމަދު ސޯލިހެވެ. އަދި އެމްޑީޕީގެ ޗެއާޕާސަން ފައްޔާޒް އިސްމާއިލް ވެސް ބައިވެރިވެވަޑައިގަތެވެ. ޖުމްހޫރީ ޕާޓީން ވަނީ ކުރިޔަށް އޮތް ރިޔާސީ އިންތިހާބުގެ ފުރަތަމަ ބުރުގައި ރައީސް އިބްރާހިމް މުހައްމަދު ސޯލިހާ ކޯލިޝަން ނުހަދައި ވަކިން ވާދަ ކުރަން ނިންމައިފައެވެ.
މި ބޭފުޅުން އެމްޑީޕީއާ ގުޅިވަޑައިގެންނެވިއިރު މިއަދަކީ އެ ޕާޓީގެ ރައީސްގެ މަގާމުގައި ހުންނެވި މަޖިލިސް ރައީސް މުހައްމަދު ނަޝީދު އެ ޕާޓީން ވަކިވި ދުވަހެވެ. ހިޔާލު ތަފާތުވުންތައް ގިނަވެ ނަޝީދު ގެންދަވަނީ އާ ސިޔާސީ ހަރަކާތެއް ލީޑު ކުރައްވަމުންނެވެ.
ކުރީގެ ކައުންސިލް މެންބަރުން ހިމެނޭގޮތަށް ޖޭޕީގެ ކުރީގެ ގިނަ މެންބަރުންތަކެއް މިއަދު އެމްޑީޕީ އަށް ސޮއި ކުރައްވައިފި.
އެމްޑީޕީއަށް މަރުޚަބާ! #Ibu2023 #MDP2023 pic.twitter.com/kWDk790VTb— MDP Secretariat (@MDPSecretariat) June 21, 2023
އެމްޑީޕީގެ އުފެއްދުމުގައި އިސް ދައުރެއް އަދާކުރެއްވި ރައީސް ނަޝީދު ވަނީ އެ ޕާޓީގެ ޗެއަރޕަސަންގެ މަޤާމުވެސް އަދާކުރައްވައިފައެވެ. އަދި ގިނަ ޕާޓީތަކެއް ވާދަކޮށްގެން ރާއްޖޭގައި ބޭއްވި ފުރަތަމަ ރިޔާސީ އިންތިޙާބު އެމްޑީޕީއަށް ކާމިޔާބުކޮށްދެއްވީ އެމަނިކުފާނު ރިޔާސީ ކެނޑިޑޭޓަކަށް ހުންނަވައިގެނެވެ.
