ސައުދީ އަރަބިއްޔާގެ ކުރީގެ ރަސްގެފާނު ފައިސަލް ބިން އަބްދުލްއަޒީޒް އާލް ސައުދަކީ އިސްލާމީ އުންމަތުގެ ހައްގުތަކަށްޓަކައި، ހާއްސަކޮށް ފަލަސްތީނާއި ގުދުސްގެ މިނިވަންކަމަށްޓަކައި ފާހަގަކޮށްލެވޭ ފަދަ ވަރުގަދަ ނިންމެވުންތަކެއް ނިންމެވި ލީޑަރެކެވެ. އެމަނިކުފާނުގެ ޒައާމަތުގައި ދެއްކެވި ހިތްވަރާއި ސާބިތުކަން މިއަދާ ހަމައަށްވެސް ތާރީހުގައި ރަން އަކުރުން ވަނީ ފަވާލެވިފައެވެ.
1973 ވަނަ އަހަރުގެ ތެލުގެ ހަނގުރާމަ
1973 ވަނަ އަހަރު އަރަބި-އިސްރާއީލް ހަނގުރާމަ ހިނގަމުންދިޔަ ދުވަސްވަރު، އިސްރާއީލަށް ވާގިވެރިވާ ގައުމުތަކާ ދެކޮޅަށް ކިންގް ފައިސަލް އެޅުއްވި އެންމެ ވަރުގަދަ ފިޔަވަޅަކީ ތެޔޮ ބޭރުކުރުން ހުއްޓާލުމެވެ. މިއީ މުޅި ދުނިޔޭގެ އިގްތިސާދަށް ބޮޑު ލޮޅުމެއް އަރުވާލި ނިންމެވުމެކެވެ. މި ނިންމެވުމުގެ ސަބަބުން ހުޅަނގުގެ ގައުމުތަކަށް ބޮޑެތި ގޮންޖެހުންތަކާ ކުރިމަތިވެ، އެމެރިކާ ފަދަ ބާރުގަދަ ގައުމުތަކުން ސައުދީ އަރަބިއްޔާއަށް ޕްރެޝަރު ކުރަން ފެށިއެވެ.
ހެންރީ ކިސިންޖަރާ ބައްދަލުކުރެއްވުން
އެމެރިކާގެ އޭރުގެ ސެކްރެޓަރީ އޮފް ސްޓޭޓް ހެންރީ ކިސިންޖަރު، ތެލުގެ ބޮއިކޮޓް އުވާލުމަށް އެދިވަޑައިގެން ޖިއްދާގައި ކިންގް ފައިސަލްއާ ބައްދަލުކުރެއްވިއެވެ. މި ބައްދަލުވުމުގައި ކިސިންޖަރު އެކި ގޮތްގޮތުން ބިރުދައްކައި، އިގްތިސާދީ ގޮތުންނާއި އަސްކަރީ ގޮތުން ކުރިމަތިވެދާނެ ނުރައްކާތަކުގެ ވާހަކަ ދެއްކެވި ކަމަށް ތާރީހީ ލިޔުންތަކުން އެނގެއެވެ. ނަމަވެސް ކިންގް ފައިސަލް ހުންނެވީ އެމަނިކުފާނުގެ އުސޫލުތަކުގައި ސާބިތުކަން މަތީގައެވެ.
ތާރީހީ ބަސްފުޅުގެ ހަގީގަތް
މި ބައްދަލުވުމުގެ ތެރެއިން ކިންގް ފައިސަލް ވިދާޅުވި ކަމަށް މަޝްހޫރުވެފައިވާ ބަސްފުޅަކީ، "އަހަރެމެންނާއި އަހަރެމެންގެ ކާބަފައިން އުޅުނީ ކަދުރާއި ފެނުން (ނުވަތަ ކަދުރާއި ކިރުން)، އަލުން އެ ދިރިއުޅުމަށް ރުޖޫއަވުމަކީ އަހަރެމެންނަށް އުނދަގޫ ކަމެއް ނޫން" މި ބަސްފުޅެވެ. މީގެ މާނައަކީ އިސްލާމީ މުގައްދަސް ބިންތަކުގެ ހައްގުގައި ކޮންމެ ފަދަ އިގްތިސާދީ ދަތިކަމެއް އުފުލަން ޖެހުނަސް އެކަމަށް ތައްޔާރަށް ހުންނެވި ކަމެވެ. ގުދުސްގެ އެންމެ އިންޗިއެއްވެސް ދޫކޮށްނުލައްވާނެ ކަމުގެ ވަރުގަދަ މެސެޖެއް މުޅި ދުނިޔެއަށް އެމަނިކުފާނު ދެއްވިއެވެ.
އެހެންކަމުން، ކިންގް ފައިސަލްގެ މި ހިތްވަރުގަދަ އަމަލުފުޅަކީ މިއަދުގެ މުސްލިމް ލީޑަރުންނަށް ހުރި ނަމޫނާއެކެވެ. އެމަނިކުފާނު ދަސްކޮށްދެއްވީ ދުނިޔޭގެ މާއްދީ މުއްސަނދިކަމަށްވުރެ އީމާންތެރިކަމާއި، ގައުމީ އަދި ދީނީ ކަރާމާތް މާ މަތިވެރިކަމެވެ. ގުދުސް މިނިވަންކުރުމަށް އެމަނިކުފާނު ގެންގުޅުއްވި ހުވަފެނާއި، އެކަމަށްޓަކައި ދެއްކެވި ސާބިތުކަމަކީ އިސްލާމީ ތާރީހުން ދުވަހަކުވެސް ފޮހެވިގެންދާނެ ކަންކަމެއް ނޫނެވެ.
