އެމެރިކާގެ ފިލަޑެލްފިއާއަށް އުފަންވެ، އެ ބިމަށް ބޮޑުވި އެންޖެލީނާ ރިވޭރާ އަކީ އޭނާގެ މަންމަގެ އެދުމުގެ މަތިން ކޮންމެ އާދިއްތަ ދުވަހަކު ފައްޅިއަށް ގޮސް އުޅުނު، ކްރިސްޓިއަން ދީނުގެ ކަންކަމަށް ސަމާލުކަންދިން ކުއްޖެކެވެ. ނަމަވެސް، އޭނާގެ ހިތުގައި ދީނާ މެދު ސުވާލުތައް އުފެދެން ފެށީ ވެސް ހައިރާންވާފަދަ ގޮތަކަށް، ފައްޅީގެ ދަރުސްތައް އަޑުއަހަން ފެށި ހިސާބުންނެވެ.
"ފައްޅިން ކިޔައިދޭ ބައެއް ކަންކަމަކީ އަހަރެންގެ ބުއްދިއަށް ގަބޫލުކުރެވޭނޭ ކަންކަމަކަށް ނުވި. އެހެންވެ ހުރިހާ ކަމަކާ މެދު ސުވާލު އުފެދުނީ،" އެންޖެލީނާ ކިޔައިދިނެވެ. "ކަލަކީ ކާކު ހެއްޔެވެ؟ އުފެއްދެވީ ކާކު ހެއްޔެވެ؟ އަހަރެމެން މި ދުނިޔެއަށް ފޮނުއްވީ ކީއްވެ ހެއްޔެވެ؟ މިފަދަ ސުވާލުތަކަށް ޖަވާބުދޭނޭ އެކަކުވެސް ފައްޅިއަކުން ނުފެނުނު."
ޖަވާބެއް ނުލިބި ހޯދުންތަކުގައި އުޅުނު މި ޒުވާން އަންހެން ކުއްޖާ، ދެން މި ސުވާލުތައް ކުރިމަތިކުރުވީ އޭނާގެ މުސްލިމް ރައްޓެހިންނަށެވެ. އެކުވެރިންނަކީ ދީނުގެ ކަންކަމަށް މާބޮޑަށް އަމަލުކޮށް އުޅުނު ކުދިންނަށް ނުވިޔަސް، އެންޖެލީނާ ކުރި ސުވާލުތަކަށް އެކުދިން ދިނީ ސީދާ، ސާފު ޖަވާބުތަކެކެވެ.
އިސްލާމްދީނުގައި އެއްވެސް ކަމެއް ފޮރުވުމެއް ނެތި، ބުއްދިއަށް ގަބޫލުކުރެވޭ ތެދު ޖަވާބުތައް ލިބުމުން އެންޖެލީނާ އިންޓަނެޓްގެ ޒަރީއާއިން އިތުރަށް ދިރާސާކުރަން ފެށިއެވެ. އޮންލައިންކޮށް ފެނުނު އިލްމުވެރިންގެ ވާހަކަތަކުން އޭނާގެ ލޮލުން ކަރުނަ ހިލުވާލިއެވެ. ސުވަރުގެއާއި ނަރަކައިގެ ވާހަކަތަކާއި، މާތްﷲ ގެ ރަހުމަތްފުޅުގެ ބޮޑުކަން އިވުމުން އޭނާގެ ހިތް ބުންޏެވެ: "އެންޖެލީނާ އެވެ! އިތުރު ކޮން ހެއްކެއް ހެއްޔެވެ؟ މިއީ ތެދު ދީނެވެ."
ރަސްމީކޮށް އިސްލާމްވުން
އެއީ ބަރަކާތްތެރި ރަމަޟާން މަހެވެ. އެންޖެލީނާ ކޮޓަރީގައި ބަންދުވެގެން އިނދެ އިންޓަނެޓުން ހޯދަމުންދިޔައީ "މުސްލިމަކަށް ވާނީ ކިހިނެއް؟" މި ސުވާލަށް ޖަވާބެކެވެ. ތިން އަހަރު ވަންދެން ދީން ދިރާސާކުރުމަށްފަހު، ޔޫޓިއުބް ވީޑިއޯތަކުން އޭނާ ވަނީ ޝަހާދަތް ކިޔާނޭ ގޮތް ދަސްކޮށް، ހިތާހިތުން އެތައް ފަހަރަކު ކިޔާފައެވެ.
އަދި މުސްލިމުން ނަމާދުކުރާ ގޮތް ބަލައި، އަމިއްލައަށް ނަމާދުގެ ހަރަކާތްތައް (ރުކޫއާއި ސަޖިދަ) ކޮށްލުމުން އޭނާގެ ހިތަށް ބަޔާންކުރަންދަތި އުފާވެރިކަމެއް ލިބުނެވެ.
އޭނާ މަސައްކަތްކުރާ އޮފީހުން ދިމާވި މުސްލިމް އަންހެނެއް ކައިރި، އޭނާ އިސްލާމްވާން ބޭނުންވާ ވާހަކަ ބުނުމުން، އެ އަންހެންމީހާ އެންޖެލީނާއަށް ކައިރީގައި ހުރި މިސްކިތެއްގެ އިމާމެއްގެ ނަންބަރު ދިނެވެ. އެންޖެލީނާ ކުޑަކޮށްވެސް ފަސްޖެހުމެއް ނެތި ވަގުތުން ގުޅާފައި ބުންޏެވެ: "އަހަރެން ބޭނުމީ މިހާރު އިސްލާމްވާށެވެ. ވަޒީފާ ނިންމާލާފައި ދާނަމެވެ."
އެދުވަހުގެ ހަވީރު، ފިނި މޫސުމަށް ބޭނުންކުރާ ބޮލުފޮތިގަނޑަކުން ހިޖާބު އަޅައިގެން މިސްކިތަށް ގޮސް، އޭނާ ރަސްމީކޮށް އިސްލާމްވިއެވެ.
ގޮންޖެހުންތަކާއެކުވެސް ސާބިތުވުން
އިސްލާމްވިތާ އެންމެ ހަފުތާއެއްގެ ތެރޭގައި އެންޖެލީނާ ފުރިހަމައަށް ބުރުގާ އަޅަން ފެށިއެވެ. "އެއީ އަހަރެންގެ ބޮލުގައި އެޅުނު ރާނީއެއްގެ ތާޖެއް ފަދަ އެއްޗެއް،" އޭނާ ބުންޏެވެ.
ނަމަވެސް، ބުރުގާ އެޅުމުން އޮފީސް މާހައުލުންނާއި އާންމުންގެ ފަރާތުން ފުރައްސާރައާއި ތަފާތުކުރުންތަކާ ކުރިމަތިލާން ޖެހުނެވެ. ހިތްހަމަޖެހުން ހޯދުމަށްޓަކައި އޭނާ ވަޒީފާ ދޫކޮށްލިއެވެ. އެންމެ ބޮޑު ހިތްދަތިކަމެއް ލިބުނީ އަމިއްލަ މަންމަގެ ފަރާތުންނެވެ. މަންމަގެ ވިސްނުން ހުރި ގޮތުން، ދަރިފުޅު ނަރަކައަށް ހިނގައިދާނެތީ ބިރުން، މަންމަ ދިޔައީ ނުރުހުން ފާޅުކުރަމުންނެވެ.
ނަމަވެސް، އިސްލާމްދީނުގައި އާއިލާއަށް ހެޔޮކޮށް ހިތުމަށް އަންގަވާފައިވާ މިންވަރު ދަސްވުމުން، އެންޖެލީނާ މަންމަގެ ހަރުކަށި ބަސްތަކަށް ރައްދުދިނީ އޯގާތެރިކަމާއި ކެތްތެރިކަމާއެކުގައެވެ. ދުވަސްތަކެއް ފަހުން މަންމަގެ ވިސްނުން ބަދަލުވެ، ބުނަން ފެށިއެވެ: "ދަރިފުޅު ތިޔަ ދީނުގައި ތިޔަހުރި ސާބިތުކަމާއި ހިތްވަރަށް އަހަރެން ފަޚުރުވެރިވަމެވެ."
އެންޖެލީނާ ރިވޭރާގެ މި ދަތުރުން ހާމަވަނީ، ހަގީގަތް ހޯދަން އެދޭ އިންސާނަކަށް ސާފު އަދި ބުއްދިއަށް ގަބޫލުކުރެވޭ ޖަވާބުތަކެއް ލިބުމުގެ މުހިންމުކަމެވެ. އިސްލާމްދީނަކީ އޭނާގެ ހިތުގެ ސުވާލުތަކަށް ފުރިހަމަ ޖަވާބުދިން ދީނެވެ. އެ ދީނުގެ ސާފުކަން އޭނާގެ މުޅި ދިރިއުޅުން އަލިކޮށް، ބަދަލުކޮށްލިއެވެ.
