ޣައްޒާ ހަނގުރާމަ ފެށުނު ފަހުން އިސްރާއީލުން ފަލަސްތީނުގެ މަސައްކަތްތެރިންގެ ވޯކް ޕާމިޓް ނުވަތަ މަސައްކަތު ހުއްދަ ފުޅާ ދާއިރާއެއްގައި ބާތިލުކުރުމާ ގުޅިގެން، އިސްރާއީލުން ހިފާފައިވާ ހުޅަނގު އައްސޭރީގެ އިގްތިސާދީ ހާލަތު ވަރަށް ބޮޑަށް ގޯސްވެ، ފުން މުސީބާތެއްގެ ތެރެއަށް ވެއްޓިއްޖެއެވެ. މި ނިންމުމުގެ ސަބަބުން ގާތްގަނޑަކަށް 100,000 އެއްހާ މަސައްކަތްތެރިންގެ އާމްދަނީ ވަނީ އެއްކޮށް ހުއްޓިފައެވެ.
އިސްރާއީލުގައި ކުރާ މަސައްކަތުން ލިބޭ ބޮޑު އާމްދަނީއަށް ބަރޯސާވެގެން އުޅުނު އެތައް ހާސް އާއިލާއަކަށް މިހާރު ވަނީ ކާބޯތަކެއްޗާއި، ކުލި އަދި އަސާސީ ބޭނުންތައް ފުއްދުމަށް ނުކުޅެދިފައެވެ. ތަފާސްހިސާބުތަކުން ދައްކާ ގޮތުގައި ހުޅަނގު އައްސޭރީގައި ވަޒީފާ ނެތް މީހުންގެ ނިސްބަތް މިހާރު ވަނީ 30 އިންސައްތައަށް އުފުލިފައެވެ.
ވޯލްޑް ބޭންކުން ވަނީ ހުޅަނގު އައްސޭރީގެ އިގްތިސާދު އެއްކޮށް އިނދަޖެހިދާނެ ކަމުގެ އިންޒާރު ދީފައެވެ. އާމްދަނީ ހޯދޭނެ އެހެން މަގެއް ނެތުމުގެ ސަބަބުން ގިނަ ބަޔަކު ދަނީ ދަރަނިވެރިވަމުންނެވެ. އަދި ބައެއް މީހުން ކަޅު ބާޒާރުން މަސައްކަތު ހުއްދަ ހޯދުމަށާއި، ނުރައްކާތެރި ގޮތްގޮތަށް ބޯޑަރު ހުރަސްކޮށް އިސްރާއީލަށް ވަނުމަށް މަސައްކަތް ކުރަމުންދާ ކަމަށް ރިޕޯޓްތައް ބުނެއެވެ.
އިސްރާއީލުން ބުނަމުންދަނީ މަސައްކަތު ހުއްދަ ބާތިލުކުރީ ސަލާމަތީ ސަބަބުތަކަށްޓަކައި ކަމަށެވެ. ނަމަވެސް މިހާތަނަށް އަލުން ދޫކޮށްފައިވަނީ ވަރަށް މަދު ހުއްދައެކެވެ. މިކަމުގެ ސަބަބުން މުޅި މުޖުތަމައުގެ ނިޒާމު ރޫޅި، އިޖުތިމާއީ ބޮޑު ހަލަބޮލިކަމެއް އުފެދިދާނެ ކަމުގެ ބިރު މިހާރު ވަނީ ބޮޑުވެފައެވެ.
