އީރާނުން އެމެރިކާއާއެކު "ސީރިއަސްކޮށް ވާހަކަދައްކަމުން" ދާކަމަށާއި، އެ ގައުމުން ނިއުކްލިއާ ހަތިޔާރު ދޫކޮށްލުމަށް އެއްބަސްވާނެ ކަމަށް އުންމީދު ކުރައްވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ދުވަހު ވިދާޅުވެއްޖެއެވެ.
އެއާފޯސް ވަންގައި ދަތުރުކުރައްވަމުން ނޫސްވެރިން ކުރި ސުވާލުތަކަށް ޖަވާބު ދެއްވަމުން ޓްރަމްޕް ވިދާޅުވީ، ދެފަރާތަށްވެސް ގަބޫލުކުރެވޭ ފަދަ އެއްބަސްވުމަކަށް އީރާނުން އަންނާނެ ކަމަށް އުންމީދު ކުރައްވާ ކަމަށެވެ. އަދި އީރާނާ ގުޅޭގޮތުން އެމެރިކާގެ އަސްކަރީ ބާރުތައް އެ ސަރަހައްދަށް މިހާރު ފޮނުވާފައިވާކަންވެސް ރައީސް ޓްރަމްޕް ފާހަގަކުރެއްވިއެވެ.
"އަޅުގަނޑު އުންމީދު ކުރަނީ އެބޭފުޅުން ގަބޫލުކުރެވޭ ފަދަ ކަމަކަށް މަޝްވަރާ ކުރާނެ ކަމަށް،" ޓްރަމްޕް ވިދާޅުވިއެވެ. އޭނާ އިތުރަށް ވިދާޅުވީ ނިއުކްލިއާ ހަތިޔާރު ނުހިމެނޭ ގޮތަށް ހިތްހަމަޖެހޭ ފަދަ އެއްބަސްވުމެއް ގާއިމުކުރެވިދާނެ ކަމަށާއި، އެއީ އީރާނުން ކުރަންޖެހޭ ކަމެއް ކަމަށެވެ.
އީރާނުން މިފަދަ އެއްބަސްވުމަކަށް އަތުވެދާނެތޯ ކުރި ސުވާލަށް ޖަވާބު ދެއްވަމުން ޓްރަމްޕް ވިދާޅުވީ އެކަން ވާނެކަން ޔަގީން ނުވި ނަމަވެސް، އީރާނުން މިހާރު އެމެރިކާއާއެކު ސީރިއަސްކޮށް ވާހަކަދައްކަމުންދާ ކަމަށެވެ.
