އެމެރިކާއާއި އީރާނާ ދެމެދު ކުރިއަށްދާ ނިއުކްލިއާ ހަތިޔާރާބެހޭ މަޝްވަރާތައް ހުއްޓުމަކަށް އަތުވެދާނެ ކަމުގެ ބިރު ހީވެފައި ވަނިކޮށް، އަރަބި ނުވަ ގައުމެއް މެދުވެރިވެގެން މި މަޝްވަރާތައް އަލުން ކުރިއަށް ގެންދިއުމަށް ނިންމައިފިއެވެ. މިގޮތުން ކުރިން އިސްތަންބޫލްގައި ބޭއްވުމަށް ހަމަޖެހިފައި އޮތް މި ބައްދަލުވުން، އަންނަ ހުކުރު ދުވަހުގެ ހެނދުނު 10:00 ގައި އޮމާންގެ މަސްކަޓުގައި ބޭއްވުމަށް މިހާރު ވަނީ ތާވަލުކޮށްފައެވެ.
މި މަޝްވަރާތަކުގައި މައިގަނޑު ގޮތެއްގައި އަލިއަޅުވާލާނީ ހަމައެކަނި ނިއުކްލިއާ މައްސަލައަށެވެ. އެމެރިކާއިން ބެލިސްޓިކް މިސައިލާއި ސަރަހައްދީ ހަމަޖެހުމާ ގުޅޭ ކަންކަން އެޖެންޑާގައި ހިމެނުމަށް ބޭނުންވި ނަމަވެސް، އީރާނުގެ އެދުމުގެ މަތިން މި ބައްދަލުވުން ހަމައެކަނި ނިއުކްލިއާ ދާއިރާއަށް ހަނިކުރުމަށް ޓްރަމްޕްގެ ސަރުކާރުން ވަނީ އެއްބަސްވެފައެވެ. މިއީ އަސްކަރީ ކުރިމަތިލުމަކަށް ދިއުން ހުއްޓުވުމަށް އެޅުނު ފިޔަވަޅެއްގެ ގޮތުގައި ބެލެވެއެވެ.
އީރާނުގެ ފޮރިން މިނިސްޓަރު އައްބާސް އަރަގްޗީ ވަނީ އެކްސްގައި ކުރެއްވި ޕޯސްޓެއްގައި މި ބައްދަލުވުން އޮންނާނެކަން ކަށަވަރުކޮށްދެއްވާފައެވެ. އަދި މިކަމަށް ބޭނުންވާ އިންތިޒާމުތައް ހަމަޖައްސައިދިން ކަމަށްޓަކައި އޭނާ ވަނީ އޮމާނަށް ޝުކުރު އަދާކުރައްވާފައެވެ. މީގެ އިތުރުން ވައިޓް ހައުސްގެ އޮފިޝަލަކު ވެސް ވަނީ ހުކުރު ދުވަހު އޮމާންގައި މަޝްވަރާތައް ކުރިއަށްދާނެކަން އޭއެފްޕީ ނިއުސް އެޖެންސީއަށް ކަށަވަރުކޮށްދީފައެވެ.
މި މަޝްވަރާތައް މެދުކަނޑާލަން ޖެހުނީ އެޖެންޑާއާއި ބާއްވާނެ ތަނާ މެދު އުފެދުނު ހިޔާލުތަފާތުވުންތަކެއްގެ ސަބަބުންނެވެ. އެމެރިކާއިން ކުރިން ބުނެފައިވަނީ އެ ގައުމުން ހުށަހެޅި އެޖެންޑާއަށް އެއްބަސްނުވާނަމަ މަޝްވަރާތައް ކުރިއަށް ނުގެންދާނެ ކަމަށެވެ. ނަމަވެސް އަރަބި ލީޑަރުންގެ ބުރަ މަސައްކަތުން މިހާރު ވަނީ ދެ ގައުމުގެ ދެމެދުގައި އޮތް ނުތަނަވަސްކަން ކުޑަކޮށް، އަލުން ވާހަކަދެއްކުމުގެ މަގު ފަހިކޮށްފައެވެ.
