އެމެރިކާގެ ރައީސް ޑޮނަލްޑް ޓްރަމްޕަށް އެމެރިކާގެ އެތެރެވަރީގެ ސިޔާސީ މަސްރަހުންނާއި ބައިނަލްއަގުވާމީ ގޮތުން ކުރިމަތިވަމުންދާ ފިއްތުންތަކާއެކު، އީރާނާއި އެމެރިކާއާ ދެމެދު ހިނގަމުންދާ ހަނގުރާމައިގައި ވަކި ގޮތެއް ނިންމުމުގެ ބާރު އޮތީ އީރާނުގެ ކޮޅުގައި ކަމަށް މަސްރަހު ދިރާސާކުރާ ފަރާތްތަކުން ބުނަން ފަށައިފިއެވެ.
އެމެރިކާއާއި އިސްރާއީލުގެ އަސްކަރީ ބާރުގެ ބޭނުންކޮށް އީރާނުގެ ކަނޑުގެ ސިފައިންނާއި މިސައިލް ފޮނުވާ ސައިޓުތަކަށް ބޮޑެތި ގެއްލުންތަކެއް ދީފައިވީ ނަމަވެސް، މި ހަނގުރާމައިގެ ސަބަބުން އެމެރިކާއަށް ވެސް ދަނީ ދަތިތަކާ ކުރިމަތިވަމުންނެވެ. ވަކިން ހާއްސަކޮށް ދުނިޔޭގެ ބާޒާރުގައި ތެލުގެ އަގު އުފުލުމާއި، ކުރިއަށް އޮތް މިޑްޓާމް އިންތިޚާބު ކައިރިވަމުން އައުމަކީ ރައީސް ޓްރަމްޕަށް އޮތް ބޮޑު ގޮންޖެހުމެކެވެ.
ކޭޓޯ އިންސްޓިޓިއުޓްގެ ރިސާޗް ފެލޯ ޖޯން ހޮފްމަން ވިދާޅުވި ގޮތުގައި، އީރާނުގެ ދިފާއީ ފަލްސަފާ ބިނާވެފައިވަނީ އަމިއްލަ ފަސްގަނޑުގައި ތިބެގެން، އަސްކަރީ ގޮތުން މާ ވަރުގަދަކޮށް ދުޝްމަނުންނާ ދެކޮޅަށް ދިގު މުއްދަތަކަށް ހަނގުރާމަ ކުރުމުގެ މައްޗަށެވެ. "ބާރު އޮތީ އީރާނުގެ ކޮޅުގައި. އެމީހުން ތިބީ އަމިއްލަ ފަސްގަނޑުގައި،" ހޮފްމަން ފާހަގަކުރެއްވިއެވެ.
އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ހާމަކުރި ގޮތުގައި، މީގެ ދެ ހަފުތާ ކުރިން ފެށި "އޮޕަރޭޝަން އެޕިކް ފިއުރީ" ގެ ދަށުން އީރާނުގެ 6,000 އަށްވުރެ ގިނަ އަމާޒުތަކަށް ވަނީ ހަމަލާދީފައެވެ. މީގެ ތެރޭގައި އީރާނުގެ 90 އަށްވުރެ ގިނަ އުޅަނދު ހިމެނޭއިރު، އޭގެ ތެރެއިން 30 އުޅަނދަކީ ކަނޑުގައި މައިން ވަޅުލުމަށް ބޭނުންކުރާ އުޅަނދުތަކެވެ. ނަމަވެސް ހޮރްމޫޒް ކަނޑުއޮޅި ބަންދުވެފައި އޮތުމުން ތެލުގެ އަގު ވަނީ ފީފާއަކަށް 100 ޑޮލަރަށް އުފުލިފައެވެ.
ޕެންޓަގަންގެ ކުރީގެ އޮފިޝަލެއް ކަމަށްވާ އަރިއާން ތަބާތަބާއީ ވިދާޅުވީ، ޓްރަމްޕް މި ހަނގުރާމައަށް އޮތް ޝައުގުވެރިކަން ކުޑަވަމުންދިޔަ ނަމަވެސް، އީރާނުގެ ސަރުކާރުން އަދި ހަތިޔާރު ބަހައްޓަން ގަސްދުނުކުރާ ކަމަށެވެ. އީރާނުން ބޭނުންވަނީ ހަނގުރާމަ ދިގުދަންމާލައިގެން، އެމެރިކާގެ އެތެރޭގެ ސިޔާސީ މަސްރަހަށް އަންނަ ލޮޅުންތަކުގެ ފައިދާ ނެގުމަށެވެ.
