ރިޔަލު ދޯންޏެއްގައި ދަތުރުކުރަމުންދާއިރު، ޖެހޭ އޮޔާއި ވަޔަށް ތިބާ ވިސްނަމު ހެއްޔެވެ؟ ވަޔާ އޮޔަށް އަންނަ ބަދަލުގެ ސަބަބުން ތިބާ ބޭނުންވާ މިސްރާބަށް އެ ދޯނި ދުއްވުމަށް ފަސޭހަ ނުވާ ފަހަރު އާދޭ ނޫން ހެއްޔެވެ؟ އަދި ބޭނުންވާ ވަގުތެއްގައި ބޭނުންވާ މަންޒިލަށް ނުފޯރުމަކީވެސް އެކަށީގެންވާ ކަމެއް ނޫން ހެއްޔެވެ؟
މި ސުވާލުތަކަށް ނަޒަރު ހިންގާލާއިރު، ޖެހެމުންދާ އޮޔާއި ވައިގެ މިސްރާބު ބަދަލުކުރުމަކީ ތިބާގެ ބާރުގެ ދަށުގައިވާ ކަމެއް ނޫނެވެ. ނަމަވެސް އަޅުގަނޑުމެންނަށް ކުރެވޭނެ ކަމަކީ، މަންޒިލަށް ދަތުރުކުރުމަށްޓަކައި، ހުންގާނާއި ރިޔަލާއި ހަންޖާ އޮޔާއި ވަޔަށް ހެޔޮވަރު ކުރުމެވެ. އޮޔާ ވަޔާ ހަނގުރާމަކޮށް ކުރި ހޯދުމަކީ ކުރެވޭނެ ކަމެއް ނޫނެވެ.
އަޅުގަނޑުމެންނަށް އާދަވެފައި މިތިބީ އަޅުގަނޑުމެންގެ ވަށައިގެންވާ ކަންކަން ކޮންޓްރޯލް ކުރަން މަސައްކަތް ކުރާ ފަދަ ވިސްނުމެއްގައެވެ. ނަތީޖާއަކީ އެ ހުރިހާ ކަމެއް ކޮންޓްރޯލްކުރަން މަސައްކަތްކޮށް، ސީދާ ބޭނުންވާ އުންމީދުތަކަށް ވާސިލު ނުވުމުން، ޙަޔާތުގެ ކޮންޓްރޯލް ގެއްލި އެކަމެއް ޙާސިލުނުވީ ކަމަށް ޤަބޫލުކޮށް މާޔޫސްވެއެވެ. ނާއުންމީދުވެއެވެ.
ނަމަވެސް، ޙަޤީޤަތަކީ އަޅުގަނޑުމެންގެ ދިރިއުޅުމުގެ ހުރިހާ ކަމެއްގެ މައްޗަށް ކޮންޓްރޯލް އޮތް ކަމަށް ޤަބޫލުކުރެވުމަކީ ވަހުމެކެވެ. ކޮންޓްރޯލް ކުރެވޭނެ ހަމައެކަނި ކަމަކީ ހިނގާ ކަންތައްތަކުގެ ތެރެއިން ތިބާގެ ބާރުގެ ދަށުގައިވާ ކަންކަމެވެ.
ތިބާގެ ޙަޔާތުގައި ދިމާވާ ކޮންމެ ކަމެއްގެ މައްޗަށް ތިބާއަށް ބާރު ނުފޯރުވުނު ކަމުގައި ވިޔަސް، ޙަޔާތުގެ ދަތުރުގައި ތިބާގެ އުންމީދުތައް ޙާސިލުކުރުމަށް މަސައްކަތްކުރުމަކީ މި ކާއިނާތުގައި ތިބާއަށްޓަކައި ލައްވާފައިވާ ބޮޑު ނިޢުމަތެކެވެ. ތިބާއަށް ބާރު ނުފޯރުވޭ ކަންތައްތަކެއްގެ މައްޗަށް އަމިއްލަ ހަށިން ނެރޭ ބުންވަރަކުން ނުވަތަ ބުންވަރުން ހިއްލާ ދަލަކުން ކުރެވޭނެ ކަަމެއް ނޯންނާނެއެވެ.
ތިބާގެ އުންމީދުތަކަށްޓަކައި މަސައްކަތް ކުރަންވާނެއެވެ. ނަމަވެސް، ކޮންމެ ކަމެއް ކޮންޓްރޯލުކުރަން ތިބާ ބޭނުންވަނީ ކީއްވެ ހެއްޔެވެ؟ އެކަން ކުރާނީ ކިހިނަކުން ހެއްޔެވެ؟ އާދޭހެވެ. ޙަޔާތުގެ ކޮންމެ ފިލާވަޅަކުން ދަސްކޮށްދެނީ އެއީ ކުރެވޭނެ ކަމެއް ނޫން ކަމެވެ.
ވަށައިގެންވާ ކަންކަން ކޮންޓްރޯލުކުރެވޭނެ ކަމަށް ދެކުމަކީ ވަހުމެކެވެ. އެ ވަހުމުގެ އަވާގައިޖެހި، ބޭނުންވާ އުންމީދެއް ޙާސިލު ނުކުރެވޭ ކޮންމެ ފަހަރަކު ކަންބޮޑުވެ މާސްޔޫސްވުމަކީ އަދި އެއަށްވުރެ ބޮޑު ވަހުމެކެވެ. އެހެނީ އެކަމުގެ ސަބަބުން ހާސްވެ، މާޔޫސްވެ، ނިކަމެތިކަން ލިބޭނީ ހަމަ ތިމާއަށެވެ.
ދުނިޔޭގެ ނިޒާމުގައި ކަންކަން ރާއްވަވައި ތަދުބީރުކުރައްވާފައިވަނީ ތިބާ ބޭނުންވާ ކޮންމެ ކަމެއް ޙާސިލުކުރެވޭނެ ގޮތަކަށް ނޫނެވެ. އެހެނީ، ގެއްލިއްޖެ އެއްޗަކީ ތިބާއަށްޓަކައި ޚަލްޤުކުރެއްވި އެއްޗެއް ނޫނެވެ. އަދި ތިބާއަށްޓަކައި ޚަލްޤުކުރެއްވި އެއްޗެއް ގެއްލި ނުދާނެއެވެ. އެހެންކަމުން، ﷲ އަށް ވަކީލުކުރާށެވެ. ﷲ އާ މެދު ހެޔޮކޮށް ހީކުރާށެވެ. މާޔޫސް ނުވާށެވެ.
ތިމާއަށް މުހިންމު ކަންކަމަށް ފޯކަސްކޮށް، އުންމީދާއެކު މަސައްކަތް ކުރާށެވެ. ނިކުމެދާނެ ނަތީޖާއަކަށް ބެލުމެއް ނެތި ފުރިހަމަ ޔަޤީންކަމާއެކު މަސައްކަތް ކުރާށެވެ. ދަތުރު ކުރިއަށްދާ ވަރަކަށް ކަންކަން ދެނެގަނެވޭނެއެވެ. އެ ދަތުރުގައި ދިމާވާ ދަތިތަކާއި ތަޙައްމަލުކުރަންޖެހޭ ދަތިތަކާމެދު ޝުކުރުވެރިވެ، އެއީ ކުރިއަށް ދިއުމަށް އޮތް ބާރެއް ކަމުގައި ދެކޭށެވެ. އެ ދަތުރުގައި ދިމާވާ ކޮންމެ ކަމަކީ ދަތުރުގެ ބައެކެވެ. އެއީ ތިބާގެ ފައިދާއަށް އޮތް ކަމެކެވެ.
މާޒީގައި ކުރިމަތިވި ބަނަވިލާގަނޑަކީ އަބަދުގެ އަބަދަށް އޮންނާނެ ވިލާގަނޑެއް ނޫނެވެ. ބަނަކަންވެސް ފިލައި ހިނގައިދާނެއެވެ. އުޑުމަތިވެސް ސާފުވާނެއެވެ. ކޮންމެ ކަމެއްގެ ކޮންޓްރޯލް ކުރެވޭނެ ކަމަށް ދެކޭ ދެކުން ބަދަލުކޮށް، އުންމީދާއެކު ކުރިއަށް ފިޔަވަޅުއަޅާންވީ ތިމާއަށް މިންވަރުކުރެއްވި ކަމެއް ޙާޞިލުވާނެ ކަމުގެ ފޮނި އުންމީދާއެކުގައެވެ. މާތް ﷲ އަށް ވަކީލުކޮށް، ނުގުޑާފަދަ ޢަޒުމެއްގައެވެ.
މިއީ މިއަދެވެ. މިއަދު ކުރާނީ މަސައްކަތެވެ. ކުރެވެން ހުރި މަސައްކަތްތަކުގައި މިއަދު ހީވާގިވާށެވެ. މިއަދުގެ ބޭނުން ހިފާނީ މުސްތަޤްބަލަށްޓަކައެވެ. މިއަދުގެ މުހިއްމުކަން ދަނެ؛ އިޚްލާޞްތެރި ހިތަކާއެކު މަސައްކަތްކޮށްފިނަމަ، މާދަމާގެ ޙަޔާތް ބާއްޖަވެރިވާނެއެވެ. ވަށައިގެންވާ ހުރިހާ ކަމެއްގެ ބާރު ތިބާއަށް ނުލިބުނަސްމެއެވެ. ހުރިހާ ކަމެއްގެ ކޮންޓްރޯލް ތިބާއަށް ނުނެގުނަސް މެއެވެ.
