މަނަދޫ އަޒީގެ ޅެންހާރު: "މުއުމިނުންނާ ކާފަރުންނާ ދެމެދުވާ ތަފާތަކީ ނަމާދު"

*ރާގު! ނުދާށޭ ހެއްލިގެން ދުނިޔޭގެ ޒީނަތްތެރިކަމާމެދުގައި.،،.

ނަމާދެއްގަސްތުގައި ދޫކޮށްލުމީ ބިރުހުރިކަމެއްނޫންހޭ
ޒަމާންތައް ވޭތުވީވަރަކަށް އެ ފާފަވަނީ ބޮޑެއްނޫންހޭ

ހިތަށް ފިނިކަންއެދޭނަމަ ދުނިޔެއިންމިލިބޭ ވަގުތުކޮޅުގައި 2
މިއަށްވުރެ އިސްކަމެއްދޭންވީކަމެއް ދުނިޔޭންނެތެއްނޫންހޭ
ކިތަންމެތިމާގެ ނަންހުއްޓަސްއަރައި ދުނިޔޭގެ އުދަރެހުގައި 2
މިކަން ފުރިހަމަނުވާނަމައީ ލިބޭއުފަލެއް ނެތެއްނޫންހޭ
ޢަލާމާތެއްކަމަށް ކާފިރުކަމާ އިސްލާމްކަމާ ވަކިވާ 2
ބަލާއިރު އޭ ނަމާދުކަމަށް ޙަދީސުންވެސް އެނގޭނޫންހޭ
ޓިކެޓް ދަތުރަށް ނަގާފަދައިން މިއަދު ކުޑަހިތްވަރެއްކުރުމުން 2
ޓިކެޓްލިބި އާޚިރަތްދުވަހުން އޮތީ ސުވަރުގެ ލިބުންނޫންހޭ
ނަމާދޭ "ދޫފުޅުން" ދެފަހަރު ވަޞިއްޔަތްފުޅު ކުރެއްވެވުމުން 2
ނަމާދަށްދޭންޖެހޭ އިސްކަންވަރަށް ރަނގަޅަށް އެނގޭނޫންހޭ
ތަނެއްގައި ކޮންމެފަދަހުއްޓަސް ބަލިވެ އެނދުމަތިވެފައިމެއޮތަސް 2
ތަނެއް ތަނަވަސްފަސޭހަ ނެތަސް ޢުޛުރު މިކަމަށް ނެތެއްނޫންހޭ
ސަމާލުވެގެން އެތައްކަންތައްތަކެއް ދީނުގެ އަދާކުރިޔަސް 2
ނަމާދު އަދާނުކުރެވޭނަމަ އެއީ ނުކުރާކަމެއް ނޫންހޭ
ބިރާ ނާމާންކަމާ މޮޅިޔާ ތުރާލުން މިންޖުވުން މިއޮތީ 2
ކިރާ މީޒާނުގައި ބުރަކަންލިބޭ މި ނަމާދުގައި ނޫންހޭ

17 އޮކްޓޫބަރު 2025
*عبدالعزيزقاسم
ލިލީ ނ.މަނަދޫ