ކޮމަންޑޫ އެއަރޕޯޓު ތަރައްޤީ ކުރުމުގެ މަސައްކަތް މަޑުޖެހުމެއްނެތި ކުރިއަށްދާނެކަމަށާއި، އަންނަ އަހަރުގެ ކުރީކޮޅު 50 ހައުސިންގ ޔުނިޓް އެޅުމުގެ މަޝްރޫޢު ފައްޓަވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ކޮމަންޑޫގެ ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، އެމްއޭސީއެލްއާ ހަވާލުކޮށްފައިވާ އެއަރޕޯޓު މަޝްރޫޢުގެ ދަށުން 48.8 ހެކްޓަރުގެ ބިން ހިއްކާނެ ކަމަށެވެ. އަދި ބިން ހިއްކުމަށް ބޭނުންވާ ބަންޑްވޯލް ޖެހުމުގެ މަސައްކަތް 2 މަސްދުވަހުގެ ތެރޭގައި ނިންމާނެކަމަށް ވިދާޅުވިއެވެ.
"މިއީ ވަރަށް ޔަޤީންކަމާއެކު ސަރުކާރުން ދޭ ޔަޤީންކަމެއް. މިދިނީ އެންމެ ގިނަވެގެންވެސް އެ މަސައްކަތް ނިންމާނެ ތާރީޚުތައް. މި އަތޮޅުގައި އިތުރު 3 އެއަޕޯޓެއްގެ މަސައްކަތް މި ފަށަނީ. ޕްލޭންކޮށްގެން މި މަސައްކަތްތައް ކުރިއަށްގެންދަނީ," ރައީސް ވިދާޅުވިއެވެ.
We have signed an MoU with the Ministry of Finance and Planning and initiated the development of Sh. Komandoo Airport along with related land reclamation works. The project was officiated by Minister of Finance and Planning Moosa Zameer, our CEO and MD Ibrahim Shareef Mohamed,… pic.twitter.com/ajVaaH7PeP
— Maldives Airports Company Ltd (@MACLmedia) October 14, 2025
ރައީސް އިތުރަށް ވިދާޅުވީ، ބިން ހިއްކުމުގެ މަސައްކަތް 8 މަސްދުވަހުގެ ތެރޭގައި ނިންމައި، ގިނަވެގެން 30 މަސްދުވަހުގެ ތެރޭގައި އެއަރޕޯޓުގެ މަސައްކަތް ނިންމައި ހުޅުވާނެކަމަށެވެ.
ކޮމަންޑޫގެ ތަރައްޤީއަށް ކުރިއަށް ގެންދާ އިތުރު މަޝްރޫޢުތަކުގެ ތެރޭގައި، މިއަހަރު ތެރޭގައި ޑައިލިސިސްގެ ޚިދުމަތް ފެށުމާއި، އަންނަ އަހަރު ސްކޫލް މަރާމާތު ކުރުމުގެ މަސައްކަތް ހިމެނެއެވެ. އަދި އިންޑޯ ސްޕޯޓްސް ކޮމްޕްލެކްސްއެއް އެޅުމުގެ މަސައްކަތްވެސް އަންނަ އަހަރުގެ ކުރީކޮޅު ފަށާނެކަމަށް ރައީސް ވިދާޅުވިއެވެ.
މީގެއިތުރުން، ކޮމަންޑޫގައި ހުއްޓިފައިވާ ފެނާއި ނަރުދަމާގެ މަސައްކަތް ނިމުމުން މަގުހެދުމުގެ މަސައްކަތް ކުރިއަށް ގެންދިޔުމަށް ބަޖެޓުގައި ހިމަނުއްވާނެކަމަށްވެސް ރައީސް ވިދާޅުވެފައިވެއެވެ.
