ސްޓާ ޕްލަސް އިން މިއަހަރު ނެރުނު އެންމެ ކާމިޔާބު އެއް ސިލްސިލާ ކަމަށްވާ 'ސައިރާބް' އަށް، އޭގެ ލީޑް އެކްޓަރު ރޯހިތު ޗަންދޭލްއާ ގުޅޭ ބޮޑު މައްސަލައެއް ފެންމަތިވުމުން ކުއްލި ސިހުމެއް ލިބިއްޖެއެވެ. ބެލުންތެރިންގެ މެދުގައި ވަރަށް ބޮޑު މަޤްބޫލުކަމެއް ހޯދަމުން އައި މި ޑްރާމާގެ ލީޑް އެކްޓަރު ރޯހިތު ޗަންދޭލް، ޕޮކްސޯ މައްސަލައެއްގައި ހައްޔަރުކުރުމާ ގުޅިގެން މިހާރު ވަނީ މީޑިއާގެ ސަމާލުކަމަށް އައިސްފައެވެ.
'ސައިރާބް' ދައްކަން ފެށީއްސުރެ، އޭގެ އަސަރުގަދަ ވާހަކައާއި، އާއިލީ މައްސަލަތަކާއި، އަދި ލީޑް ކެރެކްޓަރުން ކަމަށްވާ އިޝާން އާއި ނޮޔޮނިކާއާއި މެދުގައި އޮންނަ ގުޅުމުގެ ސަބަބުން ގިނަ ބައެއްގެ ލޯބި ވަނީ ހޯދާފައެވެ. ޓީވީގެ އިތުރުން ސޯޝަލް މީޑިއާގައި ވެސް މި ސިލްސިލާގެ އަސަރުގަދަ މަންޒަރުތަކާއި ލޯބީގެ މަންޒަރުތައް ދަނީ ވަރަށް ބޮޑަށް ވައިރަލް ވަމުންނެވެ. މުނިފޫހިފިލުވުމުގެ ދާއިރާގެ މާހިރުން ސިފަކުރާ ގޮތުގައި މިއީ ސްޓާ ޕްލަސްގެ އެންމެ ހަލުވިކަމާއެކު ކުރިއަރަމުން އަންނަ އެއް ސިލްސިލާއެވެ.
ނަމަވެސް، މި ކާމިޔާބީއަށް ހިޔަނި އެޅިގެން ދިޔައީ އިޝާންގެ ރޯލު ކުޅޭ ރޯހިތު ޗަންދޭލް ހައްޔަރުކުރުމާ ގުޅިގެންނެވެ. މުމްބާއީގެ ގަޓްކޯޕަރ ފުލުހުން އޭނާ ހައްޔަރުކުރީ 16 އަހަރުގެ އަންހެން ކުއްޖަކަށް ފާރަލައި، ގޯނާކޮށް އަދި އަނިޔާކުރި ކަމުގެ ތުހުމަތުގައެވެ. ފުލުހުން ވަނީ ކުޑަކުދިންނަށް ކުރާ ޖިންސީ ގޯނާއިން ރައްކާތެރިކޮށްދޭ ޤާނޫނު (ޕޮކްސޯ) އާއި ބާރަތިޔާ ނިޔާޔާ ސަންހިތާގެ ކަމާބެހޭ މާއްދާތަކުގެ ދަށުން މައްސަލަ ރަޖިސްޓްރީކޮށްފައެވެ. މި މައްސަލައިގެ ތަޙުޤީޤު އަދިވެސް ކުރިއަށްދާއިރު، މި ތުހުމަތުތައް ކޯޓުގައި އަދި ސާބިތެއް ނުވެއެވެ.
މި ހާދިސާއާ ގުޅިގެން ޓީވީ ދާއިރާގެ ބައެއް ފަންނާނުން ވަނީ ވަރަށް ބޮޑަށް ސަމާލުވުމަށް ގޮވާލާފައެވެ. އަދި ކަން ހިނގި ގޮތް ރަނގަޅަށް ނޭނގި ގޮތް ނުނިންމުމަށް އާންމުންގެ ކިބައިން އެދިފައިވެއެވެ.
'ސައިރާބް' ގައި ރޯހިތާއެކު މަސައްކަތްކުރާ ބަތަލާ މަދިރާކްޝީ މުންޑްލޭ ބުނީ، މި ހާދިސާގެ ޚަބަރު ލިބުނީ ދާދި ފަހުން ކަމަށާއި، މިކަން އަވަހަށް ހައްލުވާނެ ކަމަށް އުންމީދުކުރާ ކަމަށެވެ. އަދި ހަމައެކަނި އެއް ފަރާތުގެ ވާހަކައަށް ބަލައިގެން ގޮތް ނުނިންމުމަށް އޭނާ ބާރުއެޅިއެވެ.
"އަހަރެން ގަބޫލުކުރާ ގޮތުގައި ގޮތެއް ނިންމުމުގެ ކުރިން ދެ ފަރާތުގެ ވާހަކަވެސް އަޑުއެހުން މުހިންމު،" އޭނާ ބުންޏެވެ. އަދި ހުރިހާ ހަގީގަތެއް ހާމަވަންދެން މީޑިއާއާއި އާންމުން މަޑުކުރުމަށް އޭނާ އެދުނެވެ.
މި ސިލްސިލާގެ ތަޖުރިބާކާރު ބަތަލާ ކިޝޯރީ ޝަހާނޭ ބުނީ މި ޚަބަރުން އޭނާއަށް ވަރަށް ބޮޑު ސިހުމެއް ލިބުނު ކަމަށެވެ. އޭނާ ހާމަކުރި ގޮތުގައި، ރޯހިތު ހައްޔަރުކުރި ޚަބަރު ފުރަތަމަ ފެނުމުން އެއީ ޕަބްލިސިޓީ ސްޓަންޓެއް ކަމަށް ހީކުރެވުނެވެ. ސަބަބަކީ މިހާރު ސިލްސިލާގައި ކުރިއަށްދާ ވާހަކައިގައި ވެސް ރޯހިތުގެ ކެރެކްޓަރު އިޝާންގެ މައްޗަށް މިފަދަ ތުހުމަތުތަކެއް ކުރެވިފައިވާތީއެވެ. ނަމަވެސް ފަހުން އެއީ ހަގީގީ ޚަބަރެއްކަން އެނގުމުން، ތަޙުޤީޤު ކުރިއަށްދާތީ އިތުރު އެއްޗެއް ބުނަން އޭނާ އިންކާރު ކުރިއެވެ.
އެ ޑުރާމާގައި ނޮޔޮނިކާގެ އަންހެން ދަރިފުޅުގެ ރޯލުން ފެނިގެންދާ ޓީނާ ވެސް ވަނީ ރޯހިތަށް ތާއީދުކޮށް ވާހަކަދައްކާފައެވެ. ޤާނޫނީ މަރުހަލާ ނިމުމުގެ ކުރިން އޭނާއަކީ ކުށްވެރިއެއް ކަމަށް ނުނިންމުމަށާއި، ހަގީގަތް ހާމަވަންދެން ކެތްތެރިވުމަށް އޭނާ ގޮވާލާފައިވެއެވެ.
މި ހުރިހާ ކަމެއް ހިނގަމުންދާއިރު ވެސް 'ސައިރާބް' ގެ ޝޫޓިންގް ދަނީ ކުރިއަށެވެ. ނަމަވެސް ޚަބަރުތައް ބުނާ ގޮތުގައި، ޤާނޫނީ މަރުހަލާ ކުރިއަށްދާ ގޮތަކުން އިޝާންގެ ރޯލަށް އާ އެކްޓަރަކު ގެނައުމާ މެދު އުފެއްދުންތެރިން ދަނީ ވިސްނަމުންނެވެ. މިކަމާ ގުޅޭގޮތުން ސްޓާ ޕްލަސް ނުވަތަ ޕްރޮޑަކްޝަން ހައުސްއިން އަދި ރަސްމީ ބަހެއް ބުނެފައެއް ނުވެއެވެ.މިވަގުތަށް ބަލާއިރު، ސައިރާބްގެ ލީޑް އެކްޓަރާ ގުޅޭގޮތުން އުފެދިފައިވާ ހަގީގީ ދިރިއުޅުމުގެ މައްސަލަތަކުގެ ސަބަބުން، ޓީވީގައި އެންމެ ބާރަށް ކުރިއަރަމުން އަންނަ އެއް ޑްރާމާގެ މަގުބޫލުކަމަށް ހިޔަނި އެޅުމުގެ ބިރު އޮތް ނަމަވެސް، އެ ސީރީޒްގެ ޝައުގުވެރި ވާހަކައިގެ ސަބަބުން ބެލުންތެރިންގެ ސަމާލުކަން އަދިވެސް ދަނީ ލިބެމުންނެވެ.
