އިނގިރޭސި ވިލާތުގެ ސަރުކާރުން އިސްރާއީލާއެކު އަލަށް ހަދަން ހުރި ވިޔަފާރީގެ އެއްބަސްވުންތަކުގެ މަޝްވަރާތައް ވަނީ ހުއްޓާލާފައެވެ. މިއީ ޣައްޒާއަށް އިސްރާއީލުން ދެމުންދާ ހަމަލާތަކާއި އިންސާނީ އެހީއަށް ހުރަސްއަޅަމުންދާތީ އެޅި ފިޔަވަޅެކެވެ. ނަމަވެސް މި ބަދަލާއެކުވެސް އިނގިރޭސި ވިލާތާއި އިސްރާއީލާ ދެމެދު އޮތް އިޤްތިޞާދީ އަދި އަސްކަރީ ގުޅުންތައް އަދިވެސް ދަނީ ދަމަހައްޓަމުންނެވެ.
ބްރެކްސިޓަށްފަހު ސޮއިކުރެވުނު އިނގިރޭސި ވިލާތް-އިސްރާއީލް ވިޔަފާރީގެ އެއްބަސްވުން އަދިވެސް ދަނީ ކުރިއަށެވެ. މި އެއްބަސްވުމުގެ ދަށުން %99 މުދަލަށް ޓެރިފް ނުނަގައެވެ. 2022 ވަނަ އަހަރު ދެ ގައުމުގެ މެދުގައި 6.88 ބިލިއަން ޕައުންޑްގެ ވިޔަފާރި ކުރެވުނެވެ. އަދި 2015 އިން 2022 އަށް އިނގިރޭސި ވިލާތުން އިސްރާއީލަށް 442 މިލިއަން ޕައުންޑްގެ ހަތިޔާރު ވިއްކާފައިވެއެވެ.
އިނގިރޭސި ވިލާތުން އިސްރާއީލަށް ދޭ އެންމެ ސީދާ އަސްކަރީ އެހީތެރިކަން ދެނީ އެފް-35 ހަނގުރާމަ ޖެޓް ޕްރޮގްރާމްގެ ތެރެއިންނެވެ. ކޮންމެ އެފް-35 ޖެޓެއްގެ %15 އުފައްދަނީ އިނގިރޭސި ވިލާތުގެ ކުންފުނިތަކުންނެވެ. އިސްރާއީލްގެ އެފް-35 ޖެޓްތަކަށް އިނގިރޭސި ވިލާތުން ޖުމްލަ 336 މިލިއަން ޕައުންޑްގެ ހިއްސާ ކޮށްފައިވެއެވެ. މި ޖެޓްތަކަކީ ޣައްޒާއަށް ދޭ ހަމަލާތަކުގައި މައިގަނޑު ގޮތެއްގައި ބޭނުންކުރާ އުޅަނދުތަކެވެ.
އިންސާނީ ޙައްޤުތަކުގެ ޖަމާޢަތްތަކުން ބުނާ ގޮތުގައި އިނގިރޭސި ވިލާތުގެ ޢަމަލުތައް ހުރީ އެއް އުސޫލަކުން ނޫނެވެ. އިސްރާއީލްގެ އަމަލުތައް ކުށްވެރިކުރާއިރުވެސް، ހަތިޔާރާއި އިޤްތިޞާދީ މަންފާ ފޯރުކޮށްދިނުން ދަނީ ކުރިއަށެވެ. އެހެންކަމުން އިނގިރޭސި ވިލާތުގެ އަނގަބަހުގެ ކުށްވެރިކުރުންތަކަކީ މާނައެއް ނެތް ކަމެއް ކަމުގައި ފާޑުކިޔާ ފަރާތްތަކުން ބުނެއެވެ.
