ކަސްޓަމްސް އިން ހިފަހައްޓާފައިވާ ދެ ކޮންޓެއިނަރު ސިނގިރޭޓް ވަގަށް ނެގި ސީރިއަސް މައްސަލައާ ގުޅިގެން ހައްޔަރުކުރި އެޕޯލޯ ހޯލްޑިންގްސްގެ ވެރިޔާ މުހައްމަދު ވަހީދު، ޝަރީއަތް ނިމެންދެން ބަންދުގައި ބޭތިއްބުމަށް ކްރިމިނަލް ކޯޓުން މިއަދު އަމުރުކޮށްފިއެވެ. މިއީ ދައުލަތުގެ ބެލެނިވެރިކަމުގެ ދަށުގައި ހުރި ގިނަ އަދަދެއްގެ މުދާ ވަގަށް ނެގުމުގެ މި މައްސަލައާ ގުޅިގެން އަޅާފައިވާ ފިޔަވަޅެކެވެ.
މި މައްސަލައަކީ މިއަހަރުގެ އެޕްރީލް 26 ވަނަ ދުވަހު މޯލްޑިވްސް ޕޯޓްސް ލިމިޓެޑް (އެމްޕީއެލް)، ހުޅުމާލެ އިންޓަރނޭޝަނަލް ޓަރމިނަލުގައި ބަހައްޓާފައި ހުއްޓާ ވަގަށް ނަގާފައިވާ ކަސްޓަމްސްގެ ދެ ކޮންޓެއިނަރު ސިނގިރޭޓާ ގުޅުން ހުރި މައްސަލައެކެވެ. ފުލުހުން ހާމަކުރިގޮތުގައި ވަހީދުގެ ހިފެހެއްޓި މައްސަލަ ތަހުގީގު ހުއްޓާލުމަށް ފުރުސަތު ނުދިނުމަށްޓަކައި، ކޯޓަށް ހާޒިރުކުރުމުން ޝަރީއަތް ނިމެންދެން އޭނާ ބަންދުކުރުމަށް މިއަދު ވަނީ އަމުރު ނެރެދެއްވާފައެވެ. މި މައްސަލާގައި ވަހީދާއި އިތުރު ވިޔަފާރިވެރިއަކާއި، ކަސްޓަމްސްގެ އޮފިސަރަކާއި އަދި އާއްމުންގެ ބަޔަކު ހިމެނޭކަން ފުލުހުން ވަނީ ހާމަކޮށްފައެވެ.
އެޕޯލޯގެ ވެރިޔާ ހައްޔަރުކުރިކަން އެންމެ ފުރަތަމަ ފުލުހުން ހާމަކުރީ މިމަހުގެ 14 ވަނަ ދުވަހުއެވެ. މީގެ އިތުރުން، މި މައްސަލައާ ގުޅިގެން އިއްޔެ ވެސް 3 އާ މީހަކު ވަނީ ހައްޔަރުކޮށްފައެވެ. އެއީ ހދ. ވައިކަރަދޫ، ނޫރަލީގެ، އަހުމަދު ޝަމީމް (42 އަހަރު)، ހ. ރުމޭނިއާ، އަހުމަދު ފިރުޝާން (35 އަހަރު)، އަދި އައްޑޫ ހިތަދޫ، ޗާންދަނީގޭ، ހުސައިން ސާމިހް (35 އަހަރު) އެވެ. މި ތިން މީހުންގެ ބަންދުގެ މުއްދަތު ކޯޓުގައި އިއްޔެ ވަނީ ކަނޑައަޅާފައެވެ.
މީގެ ތެރެއިން އަހުމަދު ޝަމީމާއި ހުސައިން ސާމިހް 7 ދުވަހުގެ މުއްދަތަށް ބަންދުކުރުމަށް ކޯޓުން އަމުރުކުރިއިރު، އަހުމަދު ފިރުޝާން 5 ދުވަހުގެ މުއްދަތަކަށް ބަންދުކުރުމަށް ވަނީ އަމުރު ނެރެދެއްވާފައެވެ. މި ތިން މީހުން ހިމެނޭގޮތަށް މި މައްސަލައާ ގުޅިގެން ހައްޔަރުކުރި މީހުންގެ ޖުމްލަ އަދަދު ވަނީ 9 އަށް އަރާފައެވެ.
މި މުދާ ވަގަށް ނެގުމުގެ މައްސަލައިގެ ތަހުގީގު ވަރަށް ބޮޑަށް ފުޅާކުރަމުންދާއިރު، އެއްވެސް ފަރާތަކަށް ދަތުރުފުރުވާނެ ފުރުސަތު ނުދިނުމަށްޓަކައި 12 މީހަކު ރާއްޖެއިން ފުރުން ވަނީ މަނާކޮށްފައެވެ. އަދި މުދާ ގެއްލުމުގައި އެމްޕީއެލްގެ މުވައްޒަފުންގެ އިހުމާލެއް ނުވަތަ ބައިވެރިވުމެއްވޭތޯ ބެލުމުގެ ގޮތުން 6 މުވައްޒަފަކު ވަނީ ވަޒީފާއިން ސަސްޕެންޑުކޮށްފައެވެ. މިފަދަ ބޮޑު މައްސަލައެއްގައި ވިޔަފާރިވެރިއެއް ޝަރީއަތް ނިމެންދެން ބަންދުކުރަން އަމުރުކުރުމަކީ، ގަވާއިދާ ޚިލާފަށް ހިންގާ ވިޔަފާރީގެ މައްސަލަތަކަށް ސަރުކާރުން ދޭ ސަމާލުކަން އާދަޔާ ޚިލާފަށް ބޮޑުކަން ހާމަކޮށްދޭ ކަމެކެވެ.
