ޙަޔާތުގެ ބައިވެރިޔަކު އިޚްތިޔާރު ކުރުމަކީ ކޮންމެ މީހެއްގެ ދިރިއުޅުމުގައި ވެސް އެޅޭ އެންމެ މުހިންމު ފިޔަވަޅެވެ. މި އިޚްތިޔާރު ކުރުމުގެ ތެރެއިން، ތިބާއަށް އިޚްތިޔާރު ކުރެވެނީ ހަމައެކަނި ދިރިއުޅުމުގެ ބައިވެރިޔާއެއް ނޫނެވެ. އެއީ ތިބާގެ ދަރިންގެ ބެލެނިވެރިޔާ އަދި އެދަރިންނަށް ތަރުބިއްޔަތު ދޭނެ މައިގަނޑު މަދަރުސާއެވެ.
މި ނަޒަރިއްޔާތުން ބަލާއިރު، ކައިވެނި ކުރަން ބައިވެރިޔަކު އިޚްތިޔާރު ކުރުމުގައި، އެމީހެއްގެ ޚުލްޤާއި ދީންވެރިކަމަށް ބޮޑު އިސްކަމެއް ދިނުމަކީ ލާޒިމު ކަމެކެވެ. ދަރިންނަކީ މައިންބަފައިންގެ އަމަލުތަކަށް ބަލައިގެން ދަސްކުރާ ބަޔަކަށް ވާތީ، ޙަޔާތުގެ ބައިވެރިޔާއަކީ ދަރިންނަށް ހެޔޮ ނަމޫނާއެއް ދައްކައިދެވޭނެފަދަ، ރަނގަޅު ޚުލްޤެއްގެ ވެރިއެއްކަން ކަށަވަރު ކުރަންޖެހެއެވެ.
އެހެންކަމުން، ބައިވެރިޔާ އިޚްތިޔާރު ކުރުމުގައި ހަމައެކަނި ބޭރު ފުށުގެ ރީތިކަމަށް ނުވަތަ ދުނިޔަވީ މަންފާއަށް ބަލައިގެން ނުވާނެއެވެ. އެއީ، ދެމިގެންދާ އުފާވެރި ދިރިއުޅުމެއް ބިނާކުރުމަށްޓަކައި، އަދި ދަރިންނަށް ފުރިހަމަ ތަރުބިއްޔަތެއް ފޯރުކޮށްދިނުމަށްޓަކައި، ދީންވެރިކަމާއި ރަނގަޅު އަޚްލާޤަށް އިސްކަންދޭންޖެހޭތީއެވެ.
ކައިވެނީގެ ބައިވެރިޔާގެ ހެޔޮކަމުގެ ސަބަބުން، ޢާއިލާ ބަދަހިވެ، ދަރިންނަށް އިސްލާމީ ރިވެތި އުސޫލުތަކުގެ މަތީގައި ބޮޑުވުމުގެ ފުރުސަތު ލިބިގެންދެއެވެ. މިއީ މުޖުތަމަޢަށް ހެޔޮލަފާ ޖީލެއް ބިނާކުރުމަށް އެޅޭ އެންމެ މުހިންމު ބިންގަލެވެ.
