އަންހެނަކު އޭނާގެ އާއިލާގެ މެންބަރުންނަށް ރޮށި ފިހެދިނެވެ. އަދި ބަނޑުހައިވެގެން އައި މީހަކަށްވެސް ފިހުނު ރޮށިން ބައެއް ދިނެވެ. އަދި އިތުރުވެފައި ހުރި ރޮށިތައް ގޭގެ ކުޑަދޮރު ކައިރީގައި ބެހެއްޓިއެވެ. އެއީ ބޭނުންވާ މީހުންނަށް ދިނުމަށްޓަކައެވެ.
އާދައިގެ މަތިން ކޮންމެ ދުވަހަކުވެސް އެ އަންހެނާ ރޮށި ފިހަމުން ދިޔައެވެ. ކޮންމެ ދުވަހަކު ވެސް ގައިބާރު ދެރަވެފައިވާ މުސްކުޅިއަކު އައިސް އޭނާއަށް ބޭނުންވާ ވަރަށް ރޮށި ގެންދިޔައެވެ. އެ މުސްކުޅި މީހާ އެކަމަށް ޝުކުރުވެރިވުމުގެ ބަދަލުގައި ދޫކޮށްލާ ބަހެއް އޮވެއެވެ. "ތިބާ ކުރާ ނުބައި ކަން ތިބާއަށް. ތިބާ ކުރާ ހެޔޮކަން، ތިބާއަށް އަނބުރާ އަންނާނެ."
ކޮންމެ ދުވަހަކުވެސް މިކަން ތަކުރާރު ވަމުން ދިޔައެވެ. ކޮންމެ ދުވަހަކުވެސް އެ މުސްކުޅިމީހާ އައިސް، އޭނާއަށް ބޭނުންވާ ވަރަށް ރޮށި ނެގުމަށްފަހު ހަމަ އެ ބަސް ތަކުރާރު ކުރެއެވެ. "ތިބާ ކުރާ ނުބައިކަން ތިބާއަށް. ތިބާ ކުރާ ހެޔޮކަން، ތިބާއަށް އަނބުރާ އަންނާނެ." އެ މުސްކުޅި މީހާ ތަކުރާރުކުރަމުންދިޔަ ވާހަކައާ މެދު އެ އަންހެނާ ހިތްހަމަ ނުޖެހުނެވެ. އަދި އެ މުސްކުޅިމީހާ ދެކެ ރުޅި އަންނަން ފެށިއެވެ. "ޝުކުރުވެރިވުމުގެ ބަހެއްވެސް ބުނުމެއް ނޯވޭތަ؟ އަމިއްލަ ނަފްސަށް އެ އަންހެނާ ސުވާލުކުރިއެވެ.
ކޮންމެ ދުވަހަކު، އެ މުސްކުޅި މީހާ މިހެން ބުނަމުންދާތީ، އެ އަންހެނާގެ ހިތުގައި އަނދަމުންދިޔަ އަލިފާންގަނޑު ދިއައީ ގަދަވަމުންނެވެ. އަދި އެ މުސްކުޅިއާއަށް ރޮށި ދިނުން ހުއްޓާލުމަށް ގަސްދުކުރިއެވެ. "އަހަރެން މި މުސްކުޅި މީހާގަނޑުގެ ކިބައިން ސަލާމަތްވާނަން…" އެ އަންހެނާ ހިތާހިތާ ބުންޏެވެ.
އެ މުސްކުޅިމީހާގެ އުނދަގޫ ޖެހިގެން އޭނާ ފިހުނު ރޮށިތަކަށް ވިހައެއް އެޅިއެވެ. ނަމަވެސް ވިހަލައިގެން ރޮށި ފިހުމަށްފަހު، އެ މުސްކުޅި މީހާ އަންނަންވާއިރަށް ކުޑަ ދޮރު ކައިރީގައި ރޮށިތައް ބަހައްޓަން އުޅެނިކޮށް އެ އަންހެނާގެ ދެއަތް ތުރުތުރުލާން ފެށިއެވެ.
"އަހަރެން މިކުރަނީ ކޮންކަމެއްތަ؟" އެ އަންހެނާ ހިތާހިތާ ބުންޏެވެ. ވަގުތުން އެ ރޮށިތައް އަލިފާންގަނޑުގެ ތެރެއަށް އުކާލިއެވެ. އަނެއްކާވެސް ރަނގަޅަށް ރޮށި ފިހެފައި ކުޑަދޮރުކައިރީގައި ބެހެއްޓިއެވެ. އާދައިގެ މަތިން އެ މުސްކުޅިމީހާ އައިސް، ރޮށިތައް ނަގައި ހަމަ އެއްކަލަ ވާހަކަ ތަކުރާރު ކުރިއެވެ. "ތިބާ ކުރާ ނުބައިކަން ތިބާއަށް. ތިބާ ކުރާ ހެޔޮކަން، ތިބާއަށް އަނބުރާ އަންނާނެ." އެހެން ބުނުމަށްފަހު އޭނާ ގޮސްފިއެވެ. އޭނާގެ އެ ބަސްތަކާ ހެދި އަންހެންމީހާގެ ސިކުނޑީގައި ހިނގަމުންދިޔައީ ނުތަނަވަސްކަމެވެ. އެ މުސްކުޅިމީހާއާ ދޭތެރޭ އުފެދިފައިވަނީ ވަރަށް ބޮޑު ރުޅިވެރިކަމެކެވެ.
ކޮންމެ ދުވަހަކު ވެސް އެ އަންހެންމީހާ ކުޑަދޮރުމަތީގައި ރޮށިތައް ބަހައްޓަމުންދިޔައެވެ. އަދި އޭނާއާ ދުރަށް ގޮސްފައިވާ ދަރިފުޅަށްޓަކައި އޭނާ ހެޔޮ ދުޢާ ކުރަމުން ދިޔައެވެ. އެތައް މަހެއް ވަންދެން އެ ދަރިފުޅުގެ އެއްވެސް ޚަބަރެއް ނުވެއެވެ. އެހެންވެ، އޭނާ ސަލާމަތުން އެނބުރި އައުމަށް އެ އަންހެނާ ދުޢާކުރިއެވެ.
އެދުވަހުގެ ހަވީރު ދޮރުގައި މީހާކު ޓަކި ޖަހާ އަޑު އިވުނެވެ. ދޮރު ހުޅުވާލިއިރު، އޭނާގެ ދަރިފުޅު ދޮރުމަތީގައި ހުރިތަން ފެނުމުން އޭނާ ހައިރާންވިއެވެ. އޭނާ ވަނީ ހިކި އަނަރޫފަވެފައެވެ. އޭނާ ލައިގެން ހުރި ގަމީސް ވަނީ ބާވެ ވީދިފައެވެ. އޭނާ ހުރީ ބަނޑުހައިވެފައެވެ. ކާއެއްޗަކަށް ބޭނުންވެފައެވެ. މަންމަ ފެނުމާއެކު އޭނާ ބުންޏެވެ، "މަންމާ، އަހަރެން މިތަނަށް އާދެވުނު ކަމީ އަޖައިބުކުރުވަނިވި ކަމެއް. އަހަރެން ހުރީ މަންމައާ އެންމެ މޭލެއްހާ ދުރުގަ… އަހަރެން ހުރީ ބަނޑުފުރާނަ މުއްތި ނުކުރެވޭ ފަދަ ޙާލަތެއްގަ… އެކަމަކު އެވަގުތު ގައިބާރު ދެރަވެފައިވާ މުސްކުޅިއަކާ ދިމާވި.. އަހަރެން އެ މުސްކުޅި މީހާގެ ކިބައިން ކާއެތިކޮޅަކަށް އެދި އާދޭސް ކުރިން… އޭނާ އޯގާތެރިކަމާއެކު އަހަރެންނަށް ރޮށި ގެނެސްދޭ… މިއީ އަހަރެން ކޮންމެ ދުވަހަކު ކާ އެއްޗަކީ!"
ހައިރާންވެ އަންތަރީސްވެގެންވާ ޙާލުގައި، ދޮތްދޮޅީގައި އަތް ވިދެލައިގެން، މަންމަ އެ ވާހަކަތައް އަޑުއަހަން ހުއްޓެވެ. އަދި އެ އަންހެނާގެ މޫނުގެ ކުލަވަރު ބަދަލުވެގެން ދިޔައެވެ. އަދި ހާސްކަމާއެކު ދޮރުކަނީގައި ލެނގިލިއެވެ.
އެއް ދުވަހެއްގެ ހެނދުނު އޭނާ ފިހުނު ވިހަ ރޮށިތައް މަތިން ހަނދާންވިއެވެ. އޭނާ އެ ރޮށިތައް އަލިފާނޑުތެރެއަށް އަޅާ ނުލިނަމަ، އެއީ އޭނާގެ އަމިއްލަ ދަރިފުޅު ކާނެ އެއްޗެކެވެ. އަދި އެ ދަރިފުޅުގެ ފުރާނައަށްވެސް ގެއްލުން ވީހެވެ. އެވަގުތު އޭނާއަށް ގައިބާރު ދެރަވެފައިވާ މުސްކުޅި މީހާގެ ބަސްތަކުގެ މުހިންމުކަން ވިސްނުނެވެ.
"ތިބާ ކުރާ ނުބައިކަން ތިބާއަށް. ތިބާ ކުރާ ހެޔޮކަން، ތިބާއަށް އަނބުރާ އަންނާނެ."
މިކަމުން ދޭހަވަނީ، ކުރަމުންދާ ހެޔޮ ކަންތައް ދުވަހަކުވެސް ހުއްޓާނުލާ ކުރިއަށްދިއުމުގެ މުހިއްމުކަމެވެ. އެކަމެއްގެ އަގުވަޒަން ނުކުރިނަމަވެސް މެއެވެ. ދާއިމީ ގޮތެއްގައި ކުރާ ހެޔޮކަންތަކަށް މާތް ﷲ ހެޔޮ ގޮތް މިންވަރުކޮށްދެއްވައި، ސަވާބާއި ދަރުމަ މިންވަރު ކޮށްދެއްވާނެއެވެ.
ހެޔޮ ކަންތައް ކުރުންމަތީ ދެމިހުންނަން އެދޭ ބަޔަކަށްޓަކައި އިސްލާމް ދީނުގައި ލައްވާފައިވާ ހެޔޮކަމުގެ ފުރުސަތުތައް ވަރަށް ގިނައެވެ. އަޅުން ކުރާ ހެޔޮ އަމަލު މާތް ﷲ ގަބޫލުކުރެއްވިކަމުގެ ނިޝާންތަކުގެ ތެރޭގައި ފާފަތަކަށް އަރައިނުގަނެ ހެޔޮ އަމަލުކުރުންމަތީ ދެމިހުރުން ހިމެނޭކަމަށް ޢިލްމުވެރިން ބަޔާންކުރައްވާފައިވެއެވެ.
ހެޔޮކަމުގައި ދެމި ތިބުން މުހިންމެވެ. ހެޔޮ ކަންތައްތަކުގައި ޝާމިލުވެ އުޅެ، ފަހުން އެކަންކަމަށް ފަރުވާ ކުޑަކުރުމަކީ އެކަމާމެދު ވިސްނަންޖެހިފައިވާ ކަމެކެވެ. މިއީ މީހަކު އެތައް ޚަރަދަކާއި، އެތައް މަސައްކަތެއް ކޮށްގެން ރަނގަޅު ބިނާއެއް ކުރުމަށްފަހު އެ ބިނާ އަމިއްލަ އަތުން ފުނޑުފުނޑުކޮށްލުން ފަދަ ކަމެއް ނޫންތޯއެވެ؟ އަދި ފާފަތަކަށް އެނބުރި ދިއުމަށް ގަސްތުކުރާ ހާލު، ކުރާ ހެޔޮ އަމަލުން ކުރާނީ ކޮން ފައިދާއެއްތޯ؟
