ނިލީމާގެ ހިތުގައި ވަރަށް ބޮޑު ބިރުވެރިކަމެއް އުފެދިގެން ދިޔައެވެ. އޭނާގެ ފިރިމީހާ ލައިޝަން ކުއްލިއަކަށް ބިންމައްޗަށް ވެއްޓުނީއެވެ. ނިލީމާ އަވަސް އަވަހަށް ފޯނު ނަގައި އެމްބިއުލާންސަށް ގުޅިއެވެ.
"އަވަހަށް! އަވަހަށް! އަހަރެންގެ ފިރިމީހާ ވަރަށް ބޮޑަށް ބަލިވެއްޖެ!" ނިލީމާ ހާސްކަމާއެކު އެމްބިއުލާންސަށް ގުޅިއެވެ.
މާގިނަ އިރުތަކެއް ނުވެ އެމްބިއުލާންސް އައިސް، ލައިޝަން ލައިގެން ރަށު ހޮސްޕިޓަލަށް މިސްރާބުޖެހިއެވެ. ނިލީމާ އެމްބިއުލާންސްގައި، ލައިޝަންގެ އަތުގައި ހިފަހައްޓައިގެން އިނެވެ. މަގުމަތީގައި ދަތުރުކުރަމުން ދިޔައިރު، ނިލީމާގެ ހިތުގައި ކުރީގެ ހަނދާންތައް އާވަމުން ދިޔައެވެ. ލައިޝަންއާއެކު ހޭދަކުރި އުފާވެރި ވަގުތުތަކާއި، އެކުގައި ރޭވި ކުރިމަގުގެ ޕްލޭންތަކާއި، އަދި އެމީހުންގެ ލޯބީގެ ގުޅުންތަކެވެ.
ހޮސްޕިޓަލަށް ވަދެވުމާއެކު، ޑޮކްޓަރުން އަވަސް އަވަހަށް ލައިޝަން ބަލަން ފެށިއެވެ. ނިލީމާ ކެތްމަދުވެ، ބޭރުގައި މަޑުކޮށްގެން ހުއްޓެވެ. ކޮންމެ މިނެޓަކީ ވެސް އޭނާއަށް ގަޑިއިރެއްހާ ދިގު ވަގުތެކެވެ. އޭނާގެ ހިތް ތެޅެމުންދިޔައެވެ. ކަންބޮޑުވެ ވިިސްނަމުން ދިޔައެވެ.
އިރުތަކެއް ފަހުން، ލައިޝަން ބެލި ޑޮކްޓަރު ނުކުމެ ނިލީމާ ގާތަށް އައެވެ. ޑޮކްޓަރުގެ މޫނުމަތިން ފެންނަނީ ކަންބޮޑުވުމުގެ އަސަރުތަކެވެ. އެ ހިނދު، ނިލީމާގެ ހިތް ވަރަށް ބޮޑަށް ތެޅެން ފެށިއެވެ.
"ލައިޝަންގެ ހާލަތު ވަރަށް ސީރިއަސް. ވީހާވެސް އަވަހަކަށް މާލެ ދަތުރުކުރަން ޖެހޭނެ," ޑޮކްޓަރު ބުންޏެވެ.
މި ޖަވާބު އިވުމާއެކު ނިލީމާއަށް އިތުރަށް ކެތެއް ނުކު ނުކުރެވުނެވެ. އޭނާގެ ލޮލުން ކަރުނަ ހިލިގެންދިޔައެވެ.
"ދެން ކެތެއް ނުވާނެ." ނިލީމާ ރޮމުން ބުންޏެވެ. "އަހަރެންގެ ލައިޝަންއަށް ދެރަ ގޮތެއް ވެއްޖިއްޔާ އަހަރެން ދެން ކިހިނެއް ހަދާނީ؟"
ޑޮކްޓަރު ނިލީމާގެ ކޮނޑުގައި އަތްއަޅާލައި ހިތްވަރު ދިނެވެ. "ހިތްވަރު ގަދަ ކުރައްވާ. އަޅުގަނޑުމެން އެންމެ ރަނގަޅަށް ބަލާނަން. ﷲ ގެ އިރާދަފުޅުން ރަނގަޅުވާނެ."
ނިލީމާ ބޯ ޖަހާލަމުން، ލައިޝަންއަށް އަވަސް ޝިފާއެއް ދެއްވުމަށް އެދި ދުޢާކުރަން ފެށިއެވެ. އޭނާގެ ހިތުގައި ކުރީގެ ހަނދާންތައް އާވަމުން ދިޔައެވެ. ލައިޝަންއާ ފުރަތަމަ ބައްދަލުވި ދުވަސްތަކާއި، އެމީހުންގެ ކައިވެނީގެ އުފާވެރި ދުވަސްތަކުގެ ހަނދާންތަކެވެ.
ވަގުތުތައް ފާއިތުވަމުން ދިޔައެވެ. ނިލީމާ ހޮސްޕިޓަލުގެ ކޮރިޑޯގައި އަތްދަބަސް ހިފައިގެން ކެތްމަދުވެފައި ހުއްޓެވެ. ޑޮކްޓަރެއް ނުވަތަ ނަރުހެއް އެ ސަރަޙައްދުން ދާ ކޮންމެ ފަހަރަކު، އޭނާގެ ހިތުގެ ވިންދު އަވަސްވެއެވެ. ކޮންމެ ފަހަރަކުމެ އެއީ ލައިޝަންގެ ޚަބަރެއް ގެނެސްދޭނެ މީހެއްތޯ ބަލައެވެ.
"ޔާ ﷲ ! ލައިޝަން ސަލާމަތްކޮށްދެއްވާނދޭވެ. އޭނާއަށް ޝިފާ ދެއްވާނދޭވެ." ނިލީމާ ހިތުގެ އަޑިން ދުޢާކުރަމުން ދިޔައެވެ.
ކުއްލިއަކަށް، ޑޮކްޓަރު އަނެއްކާވެސް ނުކުމެ ނިލީމާއާ ދިމާއަށް އައެވެ. ޑޮކްޓަރު ހިނިތުންވެލިއެވެ.
"ލައިޝަންގެ ހާލަތު މިހާރު ސްޓޭބަލްވެއްޖެ. އަޅުގަނޑުމެންނަށް ވަގުތީގޮތުން ހާލަތު ކޮންޓްރޯލްކުރެވިއްޖެ. ނަމަވެސް އަދިވެސް އިތުރު ފަރުވާއަށް މާލެ ދާން ޖެހޭނެ." ޑޮކްޓަރު ވިދާޅުވިއެވެ.
ނިލީމާގެ މޫނުމަތިން އުފާވެރިކަމުގެ ކުލަވަރު ފާއްދާލިއެވެ. އޭނާގެ ލޮލުން އުފަލުގެ ކަރުނަ އައިސް، ޝުކުރުވެރިކަމާއެކު ޑޮކްޓަރަށް ބަލާލިއެވެ.
"ޝުކުރިއްޔާ ޑޮކްޓަރު. ވަރަށް ބޮޑަށް ޝުކުރިއްޔާ. އަޅުގަނޑަށް ލައިޝަން ބަލާލަން ވަދެވިދާނެތޯ?" ނިލީމާ އެދުނެވެ.
ޑޮކްޓަރު ބޯޖަހާލަމުން، "އާދެ، ކުޑަ ވަގުތުކޮޅަކަށް ބައްދަލުކޮށްލެވިދާނެ. އެކަމަކު އޭނާއަށް އަދި އަރާމު ބޭނުންވާނެ."
ނިލީމާ ލައިޝަން އޮތް ކޮޓަރިއަށް ވަދެ، އޭނާގެ އަތުގައި ހިފާލިއެވެ. ލައިޝަންގެ ލޯ ހުޅުވާލިއެވެ.
"ނިލީމާ…" ލައިޝަން ވަރަށް ބަލި އަޑަކުން ގޮވާލިއެވެ.
"އާނ، ލައިޝަން، އަހަރެން މިހިރީ. ކަލާގެ ގާތުގައި. ދެން ކަންބޮޑު ނުވާތި." ނިލީމާގެ ލޮލުން ކަރުނަ އޮހޮރެމުން ދިޔައެވެ.
ލައިޝަން ހިނިތުންވެލިއެވެ. "ޝުކުރިއްޔާ ނިލީމާ. ކަލާގެ ލޯބި އަހަންނަށް ލިބޭކަން އެނގޭތީ އަހަރެން ވަރަށް އުފާވޭ."
ނިލީމާ ލައިޝަންގެ ނިތްކުރީގައި ބޮސްދެމުން ބުންޏެވެ. "އަހަރެންގެ ލޯބި ދުވަހަކުވެސް ފަނޑެއް ނުވާނެ. އަހަރެމެން މި ދަތި ދަނޑިވަޅުވެސް ކެތް ކުރާނަން. ކަލާއާއެކު ވާނަން"
އެވަގުތު ނަރުހެއް ވަދެ، މާލެއަށް ދަތުރުކުރުމުގެ ތައްޔާރީތައް ފެށުމަށް އެންގިއެވެ. ނިލީމާ އަވަސް އަވަހަށް ގެއަށް ގޮސް، ބޭނުންވާނެ ތަކެތި ހިފައިގެން އައެވެ. އޭނާގެ ހިތުގައި އަދިވެސް ބިރުވެރިކަން އޮތް ނަމަވެސް، އުއްމީދުގެ އައު ރޫހެއް އުފެދިފައި ވެއެވެ.
ދެ ގަޑިއިރު ފަހުން، އެއަރ އެމްބިއުލާންސްގައި މާލެއަށް ފުރިއެވެ. ނިލީމާ ވެސް އޭނާއާއެކު ދިޔައެވެ. މަތިންދާ ބޯޓުގައި ދަތުރުކުރަމުން ދިޔައިރު، ނިލީމާ ހަނދާންވީ އެމީހުން ކައިވެނިކޮށްގެން ހަނީމޫނަށް ދިޔަ ދަތުރެވެ. އެއީ އުފާވެރި ދަތުރެއް ކަމުގައި ވިޔަސް، މިއީ ހިތާމައިގެ ދަތުރެކެވެ. އެހެނަސް، މިއަދުގެ މި ދަތުރަކީ އެމީހުންގެ ލޯބީގެ ބާރުގަދަކަން ދައްކުވައިދޭ ދަތުރެކެވެ.
މާލޭގެ ހޮސްޕިޓަލަށް ވަދެވުމާއެކު، ޑޮކްޓަރުންގެ ޓީމެއް ލައިޝަން ބަލަން ފެށިއެވެ. ނިލީމާ އަނެއްކާވެސް ބޭރުގައި މަޑުކުރަން ޖެހުނެވެ. މިފަހަރު އޭނާގެ ގާތުގައި އޭނާގެ އާއިލާގެ މެންބަރުން ވެސް ތިއްބެވެ. އެމީހުންގެ ސަޕޯޓާއި ހިތްވަރުން ނިލީމާއަށް ކުޑަ ހަމަޖެހުމެއް ލިބުނެވެ.
ގަޑިއިރުތަކެއް ފަހުން، ޑޮކްޓަރެއް ނުކުމެ ނިލީމާއަށް ގޮވާލިއެވެ. "ލައިޝަންގެ ހާލަތު މިހާރު ރަނގަޅުވަމުން އެބަދޭ. އަޅުގަނޑުމެންނަށް ބަލީގެ އަސްލު ސަބަބު ދެނެގަނެވި، އަދި ބޭނުންވާ ފަރުވާ ދެވެމުން އެބަދޭ. އިރާދަކުރެއްވިއްޔާ ދުވަސްކޮޅެއްގެ ތެރޭގައި އެއްކޮށް ރަނގަޅުވާނެ."
ނިލީމާގެ މޫނުމަތީގައި، އުފަލުވެރިކަމުގެ ހިނިތުން ފެތުރިގެން ދިޔައެވެ. އޭނާގެ ލޮލުން އުފަލުގެ ކަރުނަ އައިސް، "الحمد لله" ކިޔާލިއެވެ.
ދުވަސްތައް ފާއިތުވަމުން ދިޔައެވެ. ލައިޝަންގެ ހާލަތު ރަނގަޅުވަމުން ދިޔައެވެ. ނިލީމާ ކޮންމެ ދުވަހަކު ހޮސްޕިޓަލަށް އައިސް، ލައިޝަންއާއެކު ވަގުތުތައް ހޭދަކުރިއެވެ. އެމީހުންގެ ލޯބި އިތުރަށް ވަރުގަދަވެ، ގުޅުން ބަދަހިވެގެން ދިޔައެވެ.
ދުވަސްތަކެއް ފަހުން، ލައިޝަން ހޮސްޕިޓަލުން ދޫކޮށްލި ދުވަހު، ނިލީމާ އޭނާގެ މޭމަތީގައި އަތް ބާއްވާލަމުން ބުންޏެވެ: "މި ތަޖުރިބާއިން އަހަރެންނަށް ދަސްވީ ދިރިއުޅުމުގެ އަގު. ކޮންމެ ދުވަހަކީ ވެސް ހަދިޔާއެއް. އަހަރެމެން މިއަދުން ފެށިގެން ކޮންމެ ދުވަހެއްގެވެސް އަގު ވަޒަންކުރާނަން."
ލައިޝަން ހިނިތުންވެލަމުން ބުންޏެވެ: "އާނ، ތީ ވަރަށް ބޮޑު ތެދެއް. އަދި އަހަރެންނަށް ދަސްވީ އަހަރެންގެ ހަޔާތުގައި އެންމެ މުހިންމު އެއްޗަކީ ކަލާކަން. ކަލާގެ ލޯބި، ކަލާގެ އަޅާލުން، އަދި ކަލާގެ ހިތްވަރު ނެތްނަމަ، އަހަރެން މިހާ އަވަހަށް ރަނގަޅެއް ނުވީސް."
ނިލީމާ، ލައިޝަންގެ އަތުގައި ބާރަށް ހިފަހައްޓާލަމުން ބުންޏެވެ: "އަހަރެމެންގެ ލޯބި މިހާރު އިހަށްވުރެ މާ ވަރުގަދަވެއްޖެ. މި ތަޖުރިބާއިން އަހަރެމެންނަށް ދަސްވީ އެކަކު އަނެކަކަށް ކިހާ މުހިންމުކަން."
އެ ދެމަފިރިން ގެއަށް ދިއުމަށް ހޮސްޕިޓަލުން ނުކުތެވެ. އެމީހުންގެ މޫނުމަތިން ފެންނަނީ އައު އުއްމީދަކާއި ހިތްވަރެކެވެ. ގެއަށް ދިޔުމަށް ޓެކްސީއަށް އަރަމުން، ނިލީމާ ވިސްނާލީ މި ހުރިހާ ކަމެއްގެ ތެރެއިން އެމީހުންނަށް ލިބުނު ފިލާވަޅުތަކާ މެދުގައެވެ.
ގެއަށް ވަދެވުމާއެކު، އެނދުގައި އޮށޯވެލައި، އަރާމުކޮށްލަން ނިލީމާ އެދުނެވެ. އޭނާ ސައި ތައްޔާރުކޮށްގެން އައެވެ. ލައިޝަންގެ ކައިރީގައި އިށީނުމަށްފަހު ވާހަކަދައްކަން ފެށިއެވެ.
"ލައިޝަން، މި ހާދިސާއިން އަހަރެމެންނަށް ވަރަށް ގިނަ ކަންތައްތަކެއް ދަސްވެއްޖެ," ނިލީމާ ބުންޏެވެ. "އަހަރެމެން ދިރިއުޅުމުގެ ކޮންމެ މޫސުމަކަށް ތައްޔާރުވާން ޖެހޭ. އަދި އެންމެ މުހިންމު ކަމަކީ، އަހަރެމެން އެކަކު އަނެކަކަށް އޮންނަ ލޯބި ދުވަހަކުވެސް ހަނދާން ނައްތާނުލުން."
އެ ރޭ، އެ ދެމަފިރިން ވަރަށް ދިގުކޮށް ވާހަކަދެއްކިއެވެ. އެމީހުންގެ ކުރިމަގާ މެދު ވާހަކަދައްކައި، އާ ޕްލޭންތަކެއް ރޭވިއެވެ.
ރޭގަނޑު ނިމި، އައު ދުވަހެއްގެ އަލިކަން ފެތުރެން ފެށިއެވެ.
ދުވަސްތައް ފާއިތުވަމުން ދިޔައެވެ. ލައިޝަން އެއްކޮށް ރަނގަޅުވެ، އާންމު ދިރިއުޅުމަށް އެނބުރި އައެވެ. ނަމަވެސް، މި ތަޖުރިބާއިން ލިބުނު ފިލާވަޅުތައް އެމީހުން ހަނދާނުގައި ބެހެއްޓިއެވެ. ކޮންމެ ހަވީރެއްގައި އެމީހުން އެކުގައި ހިނގާލަން ދެއެވެ. ދުވަހުގެ ކަންތައްތަކާ މެދު ވާހަކަދައްކައި، އެކަކު އަނެކަކަށް އިތުރަށް އަޅާލަމުން ދިޔައެވެ.
އެއް ދުވަހެއްގެ ހަވީރު، ގޮނޑުދޮށުގައި ހިނގަމުން ދަނިކޮށް، ލައިޝަން ކުއްލިއަކަށް ހުއްޓުނެވެ. އޭނާ ނިލީމާގެ ދެ އަތުގައި ހިފާލަމުން ބުންޏެވެ: "ނިލީމާ، އަހަރެން ކަލާ ދެކެ ވަރަށް ލޯބިވޭ. އަހަރެންގެ ދިރިއުޅުމުގައި ކަލާ ނެތްނަމަ، އަހަރެންނަކަށް މި ދުނިޔޭގައި އުޅެވޭނެ ކަމަކަށް ނުފެނޭ. ކަލާއަކީ އަހަރެންގެ ބާރު. އަހަރެންގެ ހިތްވަރު."
ނިލީމާގެ ލޮލުން އުފަލުގެ ކަރުނަ ފާއްދާލިއެވެ. ލައިޝަންގެ ކޮނޑުގައި ބޯއަޅާލިއެވެ. "އަހަރެންވެސް ކަލާ ދެކެ ވަރަށް ލޯބިވޭ ލައިޝަން. ކަލާއަކީ އަހަރެންގެ ދިރިއުޅުމުގެ އަލިކަން. މި ލޯތްބަށް ފަނޑުކަމެއް ނާންނާނެ."
އެއް ދުވަހެއްގެ ހެނދުނު، ނިލީމާ، ލައިޝަންއާ ދިމާއަށް ބަލައިލަމުން ހިނިތުންވެލަމުން ބުންޏެވެ: "ލައިޝަން، އަހަރެންގެ ހިތުގައި އުފާވެރި ޚަބަރެއް އެ އެބައޮތް. އަހަރެމެންނަށް ދަރިއަކު ލިބެނީ."
ލައިޝަންގެ މޫނުމަތީގައި ވަނީ އުފާވެރިކަމެވެ. ހިނިތުންވުމެވެ. އޭނާ ނިލީމާގެ ދެ އަތުގައި ބަރަށް ހިފާލަމުން ބުންޏެވެ: "މާތް ﷲ އަށް ޝުކުރުވެރިވަން! މިއީ އަހަރެމެންނަށް ލިބޭނެ އެންމެ ބޮޑު ހަދިޔާ."
މަސްތައް ފާއިތުވެގެން ދިޔައެވެ. ނިލީމާ ބަނޑު ބޮޑު ދުވަސްވަރު، އެ ދެމަފިރިންގެ ލޯބި އިތުރަށް ފުޅާވަމުން ދިޔައެވެ. ލައިޝަން، ނިލީމާއަށް އަޅާލައި، އޭނާގެ ބޭނުންތައް ފުއްދައިދިނުމަށް މަސައްކަތްކުރިއެވެ.
ނުވަމަސް ފަހުން، ނިލީމާގެ ބަނޑުގައި ރިއްސަން ފަށައިފިއެވެ. ލައިޝަން އަވަސް އަވަހަށް ނިލީމާ ހޮސްޕިޓަލަށް ގެންދިޔައެވެ. ލޭބަރ ރޫމަށް ވައްދައި، މާގިނަ އިތުރުތަކެއް ނުވަނީސް ނިލީމާ ރީތި އަންހެން ކުއްޖަކު ވިހައިފިއެވެ.
ނިލީމާ ވަރުބަލިކަމާއެކު ހިނިތުންވެލަމުން ބުންޏެވެ: "އަހަރެމެންގެ ލޯބީގެ މޭވާ. އަހަރެމެން މި ކުއްޖާއަށް ކިޔާނީ 'ރަޙްމާ'."
ލައިޝަން ބޯޖަހާލަމުން ބުންޏެވެ: "ވަރަށް ރީތި ނަމެއް. ރަޙްމާ. އަހަރެމެންގެ ލޯބި ލޯބި ކުޑަކުޑަ ރަޙްމާ."
އެ ދެމަފިރިން ރަޙްމާއާއެކު އާ ޞަފްޙާއެއް ފެށިއެވެ.
